近年由於日本簽證政策放寬，大量中國中產移居日本。由過往得富裕階層移民，變成而家連打工仔都可以移民日本定居，令當地社區面貌悄悄被改變。《日經新聞》早前推出專欄深入探討，指現時在日華人已突破84萬人，正穩步朝向百萬人邁進。而且佢哋唔一定會融入日本社會，而係打造咗屬於自己嘅「中國經濟圈」，令到佢哋可以「唔使識日文」喺日本生活都無難度。

關東「中國城2.0」 ：池袋 、埼玉

講到中國人聚居地，東京池袋北口一帶絕對榜上有名。街道上中餐廳、超市、中資電訊店鋪滿地，唔識講日文都唔怕，因為幾乎所有服務都由中國人經營。無論辦手機、租樓，甚至搵朋友，通通都可以「講中文就搞掂」。附近區域如高田馬場、新大久保都係熱門地段，吸引大量中國人居住。

除咗東京市區之外，亦有唔少中國人開始搬出市區，向郊區發展。《日經》記者探訪埼玉縣川口市UR芝園團地，佢哋直言：「以為自己去錯地方，以為去咗中國！」總戶數2454戶，超過一半都係中國人，區內商舖標價用簡體字、雜貨店賣中國食品、幼稚園都係專收中國小朋友。連店員都話：「每日講中文多過日文，日文都唔識講啦！」有喺當地居住嘅中國人接受訪問時表示，呢度好似中國小區，生活習慣無需轉變，感覺好安心。

「中國經濟圈」持續擴散

唔止東京，千葉美濱區亦都成為新華人聚點。當地UR房屋推出「零禮金、免中介費、免更新費、唔使擔保人」等超吸引條件，自然成為中國家庭搵樓首選。現時已有5700名中國人聚居於此，重慶火鍋、東北菜館逐間開。

再睇遠啲，中部地區嘅愛知縣飛島村、長野縣川上村都出現大量中國「技能實習生」，喺農場、港口工作，漸漸形成「微型中國村落」。北海道占冠村人口得1600人，其中5%係中國人，喺當地滑雪度假村經營別墅。連日本最北嘅猿払村，喺2004年設立「外國研修生特區」，都成功吸引到大批中國青年幫手加工扇貝，如今每30人就有1個係中國人。

文化矛盾浮現

呢批中國新移民雖然有效解決咗日本人口老化、勞動力短缺嘅問題，但同時亦帶來唔少文化摩擦。有日本人開始投訴：「成條街都講中文，好似唔再係日本咁。」有評論認為，日本政府過往從來冇預想過中國人落地生根會咁快，變相出現政策真空。

而人多，自然爭議就多。例如福岡縣警方喺昨（20日）拘捕一對中國籍夫婦——41歲嘅李勇同42歲嘅劉曉慶，指控佢哋未經批准喺國家特別歷史遺跡「大野城遺跡」範圍內擅自開發露營場地，非法對外出租。兩人依「非法霸佔土地財產」罪被捕。事件再度引起日本社會關注，有日本網民直言：「中國人唔單止買樓，仲改變緊我哋嘅城市！」《I》