有位港男話，佢去便利店增值$500，點知當店員準備增值時，突然有位疑似內地阿伯「飛身」衝埋嚟，企圖搶先拍卡！幸好店員眼明手快，成功阻截，港男至無失財。事件曝光後，引發網民熱烈討論，大家紛紛提醒街坊要小心，唔好俾人有機可乘。

近排有大埔網民喺網上群組爆料，指喺OK便利店增值八達通時，險遭「飛身搶拍」！受害人喺群組詳細講述事發經過，指佢當時入咗$500增值，當店員收錢後準備按掣，就有個「揸住拐杖嘅老嘢」突然飛撲埋嚟，想快人一步拍卡！如果成功，「嘟」咗$500就會即刻入咗對方張八達通。

事主話，當時好彩店員未撳掣，佢先無失財。但該名老伯並無即時離開，反而有另一名男子上前「勸交」，令佢心生懷疑：「我嗰刻醒起，呢個會唔會係同黨？」但因為趕住返工，事主無繼續糾纏，選擇離開。

事件發生後，唔少大埔街坊留言，話自己都曾經遇到類似情況。有位大埔富善邨女網民留言話，佢都試過喺便利店增值時，有個阿伯伸手想拍佢張八達通，佢即刻用手擋住，並大聲質問：「你做乜呀？」阿伯竟然扮晒無辜：「我check緊餘額咋！」然後匆匆離開。

另一名街坊亦回應，話自己喺大廣樓下OK便利店都遇過類似情況，形容該店嘅八達通機放喺門邊，當時增值緊，有個阿伯伸張八達通過嚟，幸好店員夠快未撳掣，避免財物損失。

事件迅速引起關注，唔少網民話唔單止大埔有，旺角都有人遇過類似情況。有網民爆料，話自己曾經見過「搶拍黨」行騙，失敗後就會「扮死狗」撒賴。佢哋專門選擇喺早上繁忙時段落手，趁大家趕住返工分心時出擊。

事件引起網民熱議，大家紛紛留言提醒：「增值時一定要自己攞穩張卡，確認拍咗先俾錢！」、「唔好俾陌生人太接近，特別係便利店啲機，擺喺門邊真係好易中招！」

亦有網民建議，如果發現有人「搶拍」應立即報警：「如果佢拍咗唔肯畀返錢，咁同搶劫有咩分別？」「慣犯嚟！唔係一兩次！」另一名網民更直言：「朝早趕住返工邊有時間同佢玩，佢哋就係利用呢個時機嚟博一博！」《I》