中國外交部喺昨（11）日發表聲明，宣佈對菲律賓國防部長提奧多羅（Gilberto Teodoro Jr.）及其家人實施制裁。中方指責提奧多羅多次發表針對中國嘅「不負責任言論」，損害咗中國嘅正當權益，並破壞中菲關係。

根據中國外交部公佈嘅制裁措施，提奧多羅本人、其配偶及子女將被禁止進入中國內地、香港特別行政區以及澳門特別行政區。此外，中國境內嘅機構同埋個人，亦唔可以同提奧多羅及其家屬進行任何形式嘅交易、合作或其他活動。

中國官方強調，呢次制裁係為咗維護國家主權、安全同埋發展利益。中方發言人早前曾經批評提奧多羅「慣於抹黑中國」，聲稱佢為了「一己私利」，甚至喺唔同嘅國際場合上演「政治戲碼」，漠視地區人民嘅福祉。

對於呢項突如其來嘅制裁，提奧多羅喺今日（12日）作出強硬回應。佢公開表示，中國對佢同佢家人實施制裁，係對於嗰啲揭露中國「欺騙行為」嘅人嘅「慣常懲罰」。

提奧多羅喺聲明中指出：「呢係佢哋嘅權利，佢哋向來都係咁樣對待嗰啲講出真相、反對佢哋欺騙嘅人。」佢更加強調，會繼續履行作為國防部長嘅職責，堅定維護菲律賓嘅國家利益，唔會因為呢啲制裁而退縮。佢仲反擊話，中國方面所作嘅行為，比起制裁更具備「邪惡性質」。

提奧多羅仲殺人誅心咁講：「我祖上約六、七代從中國移民到菲律賓，之後再冇返去過。」「呢個係正確決定，否則我可能得唔到今日嘅地位。」佢又話唔係冇諗過去中國，文化豐富美食又多，但中共嘅作風係剝奪人民權利，都係算喇。

菲律賓外交部對中方嘅做法表示強烈不滿，形容呢係一項「唔友善嘅行為」（an unfriendly act）。菲方官員認為，中方呢個決定無助於解決南海問題，反而令原本已經繃緊嘅菲中雙邊關係變得更加複雜。

近年嚟，中菲兩國喺南海多個爭議海域多次發生摩擦，特別係喺黃岩島（Bajo de Masinloc）附近，中國海警船經常被指阻撓菲律賓船隻進入相關區域。提奧多羅早前喺新加坡「香格里拉對話」期間，亦多次公開批評中國喺爭議水域嘅擴張行為，並強調菲律賓絕對唔會犧牲自身嘅領土完整同主權。

分析人士指出，呢次針對內閣級官員嘅制裁，反映出北京對馬尼拉當前外交與防務政策嘅極度不滿。自小馬可斯政府上台後，菲律賓明顯加強咗同美國等西方國家嘅防務合作，喺南海問題上亦採取咗更為強硬嘅「透明度策略」，不斷向外界披露中國喺相關海域嘅活動。

隨住中國加大制裁力度，加之南海問題持續僵持，外界普遍擔心未來菲中兩國喺海上嘅互動將會變得更加危險，地區安全嘅不穩定因素亦隨之增加。截至目前，菲律賓政府尚未宣佈會採取進一步嘅反制措施，但強調會繼續堅守立場，保護菲律賓喺海域嘅合法權益。