李嘉誠家族嘅長和集團日前宣佈，將包括巴拿馬運河入口兩個重要港口出售畀美國財團。《華爾街日報》引述消息指，中國國家主席習近平對此感到震怒，因為長和事前冇徵得北京同意。中方原本仲打算將巴拿馬港口作為同特朗普政府討價還價嘅籌碼。長和股價持續受壓，星期三再跌2%，低見44.25元。

長和喺3月4日宣布，計劃出售中國內地同香港以外嘅港口資產，買家係美資貝萊德同意大利航運巨擘家族Apont旗下嘅TiL，預計可以套現190億美元。消息人士透露，長和突然放盤，令呢個計劃泡湯。更令中方頭痛嘅係，特朗普將巴拿馬港口變成中美爭奪全球影響力嘅象徵。

今次收購案係由美國資產管理巨頭「貝萊德」（BlackRock，又稱黑石集團）牽頭嘅財團，長和出售嘅資產並唔包括中國同香港嘅港口。據悉，長和創辦人李嘉誠同主席李澤鉅親自參與談判，美國總統特朗普亦公開讚賞呢單收購，話呢一步係為美國政府「收回」巴拿馬運河控制權邁出重要一步。

彭博早前引述匿名消息人士話，中國當局已經指示旗下機構，包括國家市場監督管理總局等，研究長和交易係咪可能危及國家安全或者違反壟斷規定。報道仲話，開展評估並唔代表一定會採取進一步行動，亦提到唔論喺中國定其他地方，呢類大規模交易通常都會引起監管機構關注。

昨（18日）香港特首李家超喺行會前被記者圍住追問睇法，佢講咗三點意見。第一指社會有很多議論，反映社會對事件關切，值得重視；第二係政府一直要求外國政府為包括香港企業提供公平公正環境，反對喺國際經貿關係使用脅迫或施壓手段；第三係必須符合法律及規則要求，特區會依法依規處理。記者即刻追問所謂「依法依規」係咪包括《港區國安法》，李家超冇正面回應，只係不斷重覆：「特區會依法依規處理。」

由移英香港傳媒人創立嘅網媒《綠豆》前（17日）更爆出猛料，指長和主席兼全國政協委員李澤鉅喺公司宣布交易當日，正身處北京出席兩會，期間被「正國級」（國家級正職）領導人召見。

前香港特首梁振英亦發文加入戰團。梁振英發文稱：「也許香港被外國管治太久了，有些香港商人誤信『商人無祖國』，以為一切『在商言商』。」佢仲話，英治時期香港商人要向英國經濟貢獻，依家美國打壓TikTok同中國企業，好明顯係扶持自家企業，認為「沒有祖國的商人只會淪為沒有父母被人欺凌的孩子。」

雖然中國政府對呢單交易感到不滿，但冇簡單方法可以阻止，因為今次出售嘅資產全部位於中國內地同香港以外，而且交易各方對順利完成交易充滿信心，令中方處於相當尷尬嘅境地。

長和公布交易之後，股價一度高見52.95元，相比宣布前嘅38.65元大升37%。投資界都普遍睇好交易完成後，長和可以減少負債，甚至可能派發特別股息，對股東嚟講係一個利好消息。

根據公開資料顯示，「長江和記實業有限公司」係香港最具規模嘅跨國企業之一，1950年由李嘉誠一手創立，至今仍然由李嘉誠家族牢牢掌控。業務版圖橫跨金融、零售、基建、電信、港口、物流等多個領域。《I》