支聯會煽動顛覆國家政權案今日九月十一日正式判刑。支聯會前正副主席李卓人、鄒幸彤，以及已解散嘅支聯會，經審訊後被裁定「煽動顛覆國家政權罪」罪成；另一名前副主席何俊仁就喺開審前認罪。三名國安法指定法官宣判刑期：鄒幸彤判監七年三個月，李卓人判監七年，何俊仁判監五年兩個月；已經解散嘅支聯會就被判罰款一百五十萬港元。今次法庭將案件界定為「情節嚴重」。判刑理由提到，被告喺當時動盪不安嘅社會氛圍之下有預謀犯案；被告相信相關政治主張可能違反《憲法》同《香港國安法》，仍然一意孤行。法庭亦特別指出，眾被告都「並非寂寂無名之輩」，喺社會上具有一定影響力，因此佢哋嘅言論同政治行動所產生嘅影響亦較大。

今日判刑有多人到庭旁聽，包括天主教香港教區榮休主教陳日君樞機、李卓人妻子，以及前支聯會常委等。李卓人同鄒幸彤聽到判刑之後表現平靜，未幾更展露笑容。李卓人被帶返羈留室之前，向旁聽席做出十字聖號手勢；鄒幸彤就向旁聽人士送出飛吻。李卓人同鄒幸彤至今已經分別被囚禁超過一千四百日。按照目前刑期推算，李卓人被判監七年，預料要到二零二九年九月左右先至刑滿；鄒幸彤刑期七年三個月，預料要到二零三○年一月左右。何俊仁刑期就相對較輕，被判監五年兩個月。由於佢案件期間曾經獲准保釋外出，至今實際還押時間約一千三百日，按目前推算，最快可能喺二零二八年四月左右出獄。

今日除咗三人刑期之外，仲有一樣相當重要嘅事情未有解決，就係「國殤之柱」究竟點樣處理。控方早前要求處理支聯會案一批證物，其中最受關注嘅，就係丹麥藝術家高志活創作、曾經長期擺放喺香港大學嘅「國殤之柱」。法官李運騰今日表示，法庭已經收到各方陳詞，但各方對「國殤之柱」嘅物主身份以及應該採取乜嘢處理方式存在分歧，因此法庭決定押後處理。李官亦認為，呢個問題毋須由三名國安法指定法官共同處理。

鄒幸彤就表示希望參與有關「國殤之柱」嘅聆訊。不過李運騰指出，鄒幸彤本身並非「國殤之柱」物主，因此「國殤之柱」最終點樣處理，表面上似乎同佢冇直接關係。法庭因此要求鄒幸彤進一步交代，究竟佢係以乜嘢法律身份參與聆訊同提出陳詞。但係「國殤之柱」嘅命運，今日仍然未有最後決定。

而呢一點相當重要，因為「國殤之柱」只係今次證物爭議之中最矚目嘅一件物品。判刑之前，鄒幸彤已經喺獄中發文，質疑控方要求沒收支聯會大量歷史資料，包括超過一千本書籍、六四相關影音資料、紀錄片、剪報同紀念物品。下一個問題，就係支聯會三十幾年保存落嚟嘅六四書籍、檔案、文物，以至「國殤之柱」，究竟會點樣處理。