美國總統特朗普喺3月9日表示，華府「即將」會恢復向烏克蘭提供情報，仲預計美國同烏克蘭嘅官員，嚟緊喺沙特阿拉伯嘅會談會有大突破。另外，佢嘅親信馬斯克亦強調，就算佢自己幾咁唔認同烏克蘭嘅政策，都絕對唔會切斷「星鏈」（Starlink）對烏克蘭嘅衛星網絡服務。

據路透社報道，特朗普當日喺「空軍一號」專機上見傳媒，記者問佢係咪考慮結束暫停向烏克蘭提供情報嘅安排，佢即刻話「即將結束」。

美國中央情報局（CIA）局長拉特克利夫上個禮拜三（5號）先透露，華府暫時停止向烏克蘭提供情報，目的是逼烏克蘭總統澤連斯基喺俄烏和談問題上配合特朗普嘅策略。烏克蘭同時面對美國情報暫停同軍事援助削減嘅雙重打擊，防禦能力受到極大影響。

美國同烏克蘭嘅官員將喺下星期二（11號）喺沙特阿拉伯嘅吉達（Jeddah）會面，討論基輔會唔會為咗停火喺礦產開發權問題上作出讓步。

特朗普表示，對今次談判好有信心，預計今個星期內就會有顯著進展，更相信烏克蘭會簽署相關礦產協議。特朗普又提到，美國現時正研究向俄羅斯加徵關稅，又話華府官員並唔擔心俄羅斯同中國、伊朗嘅軍事演習會帶嚟重大影響。

另一方面，馬斯克喺同日表示，話Starlink係烏克蘭軍隊嘅通訊骨幹，冇咗Starlink嘅話，烏克蘭嘅通訊網絡同前線作戰能力會即刻瓦解。所以，Starlink無論如何都唔會中斷服務，更加唔會拎嚟做討價還價嘅工具，Starlink永遠唔會停咗烏克蘭嗰邊嘅終端服務。

同日，波蘭外交部長西科爾斯基（Radosław Sikorski）表示，如果Starlink真係終止向烏克蘭提供服務，波蘭政府就會即刻停止同馬斯克嘅所有合作合約，又強調而家Starlink提供畀烏克蘭嘅費用，其實係波蘭政府畀緊錢。

美國國務卿魯比奧隨後澄清，話根本冇人提出要切斷Starlink同烏克蘭嘅連結，又叫西科爾斯基要識得感恩，因為如果冇咗星鏈嘅協助，烏克蘭肯定會失守，到時俄軍就會直達波蘭邊境。《I》ㄎ