全國政協十四屆三次會議今日（10日）喺北京人民大會堂正式閉幕。全國政協委員、港澳辦副主任王靈桂出席會議前接受訪問，對香港經濟表現充滿信心，強調「香港經濟情況喺全球發達經濟體中並唔弱」，仲話「1000多億元的赤字，對香港這麼大的經濟體不算甚麼」。佢又透露，未來「一簽多行」將會再進一步擴大，要香港市民做好「思想準備」。

王靈桂認為，外界對香港經濟狀況有所誤解，強調香港作為國際金融中心，經濟基礎仍然穩健，指1000幾億元赤字喺全球經濟體入面已經算係最低水平，香港本身財政儲備充足，完全唔需要過度憂慮。

佢補充話，中央近年推出多項政策支持香港，單計2024年已經有100多項惠港措施，而去到2025年及更長遠將來，中央會繼續推出更有利政策，務求進一步促進香港經濟發展。

佢又話，隨住內地經濟發展，內地旅客對香港市場帶嚟重要影響，而「一簽多行」政策實施以嚟，已經不斷擴大適用範圍，預計未來會繼續擴展，令更多內地旅客可以更便利訪港，刺激本地零售、飲食、酒店等行業消費。

佢提醒香港市民要適應呢種變化，並且強調「經過這段時間，大家（香港社會）在處理這些問題上，可能會恰當一些，因為畢竟是血濃於水，大家一定會相處得很好」，暗示香港同內地之間應該進一步加強融合。

對於香港年底即將舉行嘅立法會換屆選舉，王靈桂強調，香港議員必須具備承擔，選舉要選出「有擔當、有能力、有水平」，同時「樂於為市民服務」嘅人。佢強調香港未來要進一步發展，必須有穩定嘅政治環境，而議員作為施政團隊嘅一部分，應該對市民負責，推動政策落實，確保香港長遠發展同社會穩定。

早前，港澳辦主任夏寶龍亦曾表示，特區政府嘅財政赤字屬於溫和，社會應該對香港經濟同各方發展充滿信心。佢形容，港澳都係中國嘅掌上明珠，而政協委員作為中國嘅中堅份子，應該積極參與，唔好淨係做「裁判」，而係要多落場做「運動員」，發揮雙重積極作用。佢又提到，港澳今年將會舉行立法會換屆選舉，希望「愛國愛港」同有能力嘅人積極參選。

近年嚟，港府幾乎每年都出現財政赤字，財政司司長陳茂波早前公布2024至25年度財政預算案時亦表示，該年度嘅綜合赤字預計達港幣872億元，而2025至26年度赤字亦有670億元，財政儲備將會降至5803億元。如果不計發債，呢幾年香港已錄得數千億元的赤字

回顧歷史，近年嘅綜合赤字規模已經創下新高，超越過去幾次經濟危機週期。喺九七後初期，香港經歷亞洲金融風暴同SARS，喺1998/99至2003/04財政年度出現「六年五赤」，當時五個赤字財年累計綜合赤字規模為1961億元（包含債券收入同償還）。《I》