儘管香港各界對政府連年出現財政赤字相當關注，但港澳辦主任夏寶龍卻形容，香港財赤「屬於溫和」。

夏寶龍：對香港經濟發展要有信心

中央港澳工作辦公室主任、國務院港澳事務辦公室主任夏寶龍昨日喺北京接見中國全國港澳政協委員，期間談及香港社會關注嘅財政赤字問題。

據報導，夏寶龍表示，特區政府嘅財政赤字屬於溫和，社會應該對香港經濟同各方發展充滿信心。佢形容，港澳都係中國嘅掌上明珠，而政協委員作為中國嘅中堅份子，應該積極參與，唔好淨係做「裁判」，而係要多落場做「運動員」，發揮雙重積極作用。佢又提到，港澳今年將會舉行立法會換屆選舉，希望「愛國愛港」同有能力嘅人積極參選。

近年赤字規模創新高 超越過去經濟危機

近年嚟，港府幾乎每年都出現財政赤字，財政司司長陳茂波上星期公布2024至25年度財政預算案時亦表示，該年度嘅綜合赤字預計達港幣872億元，而2025至26年度赤字亦有670億元，財政儲備將會降至5803億元。如果不計發債，呢幾年香港已錄得數千億元的赤字

回顧歷史，近年嘅綜合赤字規模已經創下新高，超越過去幾次經濟危機週期。喺九七後初期，香港經歷亞洲金融風暴同SARS，喺1998/99至2003/04財政年度出現「六年五赤」，當時五個赤字財年累計綜合赤字規模為1961億元（包含債券收入同償還）。

國安開支撥款達130億 鄧炳強：唔會透露

雖然財赤不斷創新高，但政府可以cut福利，就絕對唔會減國安開支。特區政府喺2020/21年度首次一次性撥款80億元，作為未嚟數年維護國安開支嘅專項資金。到咗2023年5月20日，《明報》頭版報導，政府再增撥50億元作國安維護專項開支，令總撥款金額達130億元。

鄧炳強曾喺有線電視節目《家國天下》接受訪問時，提及130億元國安開支，強調每年都會向立法會提交報告，但根據《國安法》第14條，打擊危害國家安全工作需保密，機密性極高，因此所有社會對國安細節都唔會公開，有支出都唔便透露。

佢更直言：「奧妙之處就係在於，你唔知道我幾時用完，你又唔知道我用咗幾多。」佢又補充：「如果透露咗，你根據個支出就知道我哋打擊嘅方法，咁樣對於國家安全係絕對不利嘅！」

國際企業與人才加速流失

自2020年北京鎮壓香港民主抗議活動並實施《港區國安法》後，香港國際聲譽受損，導致企業同高薪專才加快流失，加劇財政困境。

值得留意嘅係，同樣喺2020年面對疫情影響，新加坡同香港都錄得巨額赤字，但前者能夠更好地控制支出相對收入嘅比例，令財政目標表現優於預期。隨住部分企業遷離香港，轉向新加坡，香港經濟前景進一步受影響。《I》