美國總統特朗普上任後，持續推行強硬貿易政策。喺2月26日首次內閣會議上，佢又揚言將對歐盟輸美產品加徵25%「對等關稅」。同時亦提到，針對墨西哥同加拿大商品嘅關稅計劃，可能會由原定3月4日生效，延遲至4月2日。

不過白宮官員隨即澄清，話特朗普仍然喺審查墨西哥同加拿大政府有冇真正落實加強邊境安全，阻止非法移民同鴉片類藥物芬太尼流入美國，原定嘅3月4日生效日期目前仲有效。

特朗普喺內閣會議上火力全開，狠批歐盟多年嚟對美國「不公平貿易」，指美國對歐洲長期錄得超過3000億美元貿易逆差，認為美國「買晒歐洲產品」，但歐洲卻「幾乎咩都唔買美國嘅產品」。佢點名歐盟對美國汽車同農產品進口設下貿易壁壘，直言「離譜」，並揚言一定會透過加徵關稅還擊。

特朗普表示，美國將會喺短期內公佈對歐盟嘅新一輪關稅措施，又話歐盟「從成立開始就係為咗壓榨美國」，重申佢不會再容許美國成為全球貿易「最大嘅冤大頭」。

歐盟作為美國第三大貿易夥伴，對於特朗普呢項關稅威脅表現強硬。歐盟委員會發言人強調，歐盟係全球最大自由市場，對美國經濟帶來利好，並非如特朗普所指係「利用美國」。又話歐盟將採取強烈反制措施，對抗任何不合理關稅，確保歐洲企業、工人同消費者利益不受損害。

根據《彭博社》分析，特朗普計劃對歐盟商品加徵25%關稅，將會影響歐盟高達293億美元（約2,285.4億港元）出口美國產品，歐洲多個工業大國恐受重創。

瑞典前首相畢爾德亦公開批評特朗普嘅歷史觀嚴重錯誤，強調歐盟本來係為咗防止歐洲大陸再爆發戰爭而成立，並非如特朗普所講係為咗針對美國。

歐盟外交與安全政策高級代表卡拉斯原定喺2月26日訪美，並與美國國務卿盧比奧會晤。不過，歐盟發言人突然宣布，由於行程調整已經取消會面。

特朗普亦同時亦批評英國對美國貿易政策唔夠開放，話英國「太過分」，美國政府將會仔細檢視美英貿易關係，睇下英國會唔會成為下一個關稅打擊目標。

不過，特朗普喺批評英國後，又留咗一條後路，表示佢相信美英貿易關係有改善空間，話佢同英國首相施紀賢關係良好，曾多次通話同會晤，雙方處得相當唔錯。佢話，睇吓有冇可能平衡美英貿易，令美國唔再成為「蝕底嘅一方」。《I》