台灣壹蘋新聞網報道，48歲台灣女星大S（徐熙媛）喺大年初五（2號）因流感併發肺炎，喺日本猝逝。正當各界處於悲痛之際，佢老公具俊曄同前夫汪小菲之間關於孩子監護權同遺產歸屬問題，都即刻成為外界關注嘅焦點。

昨（6日）深夜，具俊曄忍住悲痛首次發聲，佢強調會保護妻子所愛一切，同時所有錢都會交畀徐媽處理；而具俊曄用韓文開場一句「我的天使回到天堂」，逼哭咗數十萬人，就連大批中國網友都衝入IG留言力撐。

具俊曄昨晚發出中韓兩版本聲明，韓文版第一句就泣訴：「2025年2月2日，我的天使回到天堂。」佢承認，自己而家正處於一種冇法用言語形容嘅深切悲痛，好似有傷口不停被撕裂咁；佢更講自己冇力氣、亦唔想再多講一句，偏偏喺呢個悲傷同哀悼都未平息嘅時刻，就已經有惡意人士開始散播痛心謠言。

具俊曄仲明顯暗寸汪小菲：「有人假裝悲傷，喺雨中亂咁奔跑；而同一時間，又有其他人編出關於我哋家庭嘅假新聞，甚至捏造同保險有關嘅不實資料，為家人帶嚟額外創傷。」佢更感慨：「見到呢種人真係覺得好驚，原來真係有咁惡毒嘅人……」。所以佢希望大家能畀佢哋靜靜渡過呢段艱難時期。

具俊曄表示，大S遺留下嚟所有資產都係為咗保護深愛家人，所以佢想毫無保留畀大S父母同兩個小朋友。當然，具俊曄亦強調會通過律師同法律保障，小朋友應得權益絕唔容任何惡人覬覦，直到佢哋成年之後可以自保。佢仲話：「對我嚟講，她陪伴我嘅時光，遠遠比世上一切財富都更珍貴、更有意義。守護佢最愛嘅家人，係我能為佢做嘅最後一件事。」

佢發表呢番話之後，短短時間就有成十幾萬人按讚支持，連中國網友都特登「翻牆」去IG留言鼓勵佢：「特地過來留言支持你，受不了汪小菲張蘭毫無下限的一家人，希望你知道中國大陸有很多人替大S生前和死後遭受的污衊和造謠非常憤慨，非常努力地去澄清真相還大S和她家人一個安寧」、「真男人，為你鼓掌，大S最後沒有愛錯人」、「謝謝你，謝謝你陪熙媛最後幾年，她沒看錯人，你是最好的男人！帶著熙媛的愛，請堅強。」

亦有網友回憶：「光頭大哥，我是三年前你和大S在一起的時候給你留過言的中國網友，當時看好你，現在依然不變，你和她一起面對了被前夫一家人潑髒水的糟心事，也帶給大S很多陪伴和溫暖，命運多舛，人生無常，幸好你當時撥了電話，你們兩個都是戲劇化的人生…給你留言，想告訴你，不要理那些素質低落的鍵盤俠，加油！挺過這段艱難的時光。」《I》