日本《產經新聞》昨（19日）報道，中日兩國政府就東京電力福島第一核電站嘅核處理水排放問題，正進行最後協調，日本政府嘅目標係要中國政府取消對日本水產品嘅進口禁令。

報道引述多位外交消息人士透露，日本政府同國際原子能機構（IAEA）將喺IAEA嘅框架下，擴大監測體制，讓包括中國在內嘅第三國參與。基於呢個舉措，中方有望重新檢討相關措施。日本首相岸田文雄將喺20日同IAEA事務局長格羅西（Rafael Grossi）進行電話會談，並就擴大監測體制達成協議。

早喺7月嘅中日外長會談等場合，日本方面就要求中國即時撤銷對日本水產品嘅進口禁令，但中方則要求建立能夠監測海洋排放影響嘅體制。日本岸田政府認為，與其單獨讓中國參與監測，不如通過IAEA嘅介入，咁樣既保障日本嘅主權，又能確保調查嘅客觀性。

據外交消息人士透露，基於擴大監測體制嘅前提下，中日兩國政府已同意逐步恢復符合標準嘅日本水產品進口。預計喺岸田文雄同格羅西嘅電話會談之後，將對外發表相關消息。

中國喺去年8月日本開始排放處理水時強烈反對，稱之為「強行排放核污染水」，並採取停止進口日本水產品嘅措施，仲喺國際會議等場合批評日本嘅做法。

面對中方嘅反應，日本政府多次要求撤銷相關措施。岸田文雄去年11月喺美國三藩市同中國國家主席習近平會談時，當面要求中國基於科學根據作出冷靜嘅回應，並同意通過協商同對話搵出解決問題嘅方法。

去年8月24日，港府跟隨中央政府對日本嘅做法，宣布禁止來自東京、福島、千葉、栃木、茨城、群馬、宮城、新潟、長野同埼玉10個都縣嘅水產、海鹽和海藻食品進口本港。若中日兩國達成協議，港府會否跟隨中央放寬日本水產品限制？唔少網民都認為極有可能。

喺「連登討論區」上，有網民話：「如果中國取消，香港一定跟，好似武肺開放咁，外國全部開晒生活如常，香港死都唔開，中國一開香港就狗衝一齊開」、「做卒仔唔跟貼啲，下次想跟都冇得跟」、「香港班走狗又要轉軚，好似肺炎咁，昨天就世紀病毒，隔一日就全面開放」。

日本駐港總領事館早前指出，受港府對日本水產品實施管制影響，去年9月至12月日本出口香港水產價值按年大跌33.1%至46.9%。批評港府管制措施並不基於科學證據，又指世界其他國家少有實施類似管制，對此表示遺憾(regrettable)。

日方又指國際原子能機構今年1月和7月發表報告多次確認排放核處理水安全，日方將繼續提供高透明度同可靠嘅科學數據，要求港府即時移除對日本水產嘅管制措施。《I》