一名美國、土耳其雙重國籍女子近日喺約旦河西岸反對猶太屯墾區擴張嘅示威活動中中槍身亡。雖然以色列方面表示事件係意外，但美國國務卿布林肯放話要求以軍徹底改善佢哋喺約旦河西岸嘅行為準則。

根據路透社同法新社報道，死者係26歲嘅土耳其裔美籍女子埃吉（Aysenur Ezgi Eygi），事發喺本月6日，地點係距離那不魯斯（Nablus）唔遠嘅貝塔（Beita）村莊，呢個地方長期遭到極右猶太屯墾者攻擊。巴勒斯坦官員話，埃吉係來自美國西雅圖嘅社運人士，擁有美國同土耳其雙重國籍。

埃吉最近先啱啱由西雅圖華盛頓大學畢業，校長考斯（Ana Mari Cauce）發表聲明，對埃吉不幸喪命感到極度悲傷，並形容佢對其他學生有「正面影響」。

以軍初步調查認為，致命嘅子彈係由以軍發射，佢哋表示對此深感遺憾，並強調呢次係無心之失，原本目標係暴動嘅煽動者，唔係埃吉本人。

那不魯斯附近嘅醫院院長納法（Fouad Nafaa）話，埃吉被送到醫院時已經情況危殆，頭部重傷，儘管搶救，但最後都不幸離世。

巴勒斯坦官方媒體「瓦法社」（WAFA）報道，呢宗槍擊發生喺貝塔村莊嘅例行抗議期間。貝塔經常係猶太屯墾者同巴勒斯坦人之間嘅衝突地。

美國聯邦參議員范霍倫（Chris Van Hollen）指出，埃吉係自從去年10月7日哈馬斯襲擊以色列，引發加沙戰爭並令約旦河西岸暴力升級以來，第3位死喺西岸嘅美國公民。佢批評拜登政府喺追求公義同追責方面做得唔夠多，並指出如果以色列內塔尼亞胡政府唔為美國人伸張正義，美國司法部必須採取行動。

土耳其總統埃爾多安亦強烈譴責埃吉遇害，並喺社交平台發文表示，土耳其會喺所有平台阻止以色列嘅「佔領同種族滅絕政策」。但以色列政府對此作出否認，認為佢哋喺巴勒斯坦被佔領土嘅行動並唔構成種族滅絕。

美國總統拜登表示，埃吉嘅死係「意外」，但國務卿布林肯今日用上最強硬嘅語氣譴責以色列，形容呢件事係「無端同不正當」。佢話，美國會堅持要求以色列政府徹底改變佢哋軍隊喺約旦河西岸嘅行動規則。

布林肯喺倫敦對記者表示：「冇人應該因為參與抗議而被槍擊甚至喪命，冇人應該為自由表達意見付出生命代價。」佢重申，以色列安全部隊必須改變佢哋喺西岸嘅行動方式，並指出，埃吉係第二位美國公民因以軍行動而喪生，實在令人難以接受。以色列政府發言人婉拒對布林肯嘅發言置評。《I》