烏克蘭媒體《基輔獨立報》報道，烏軍喺今（10日）凌晨發動咗大範圍同大規模嘅無人機襲擊，針對俄羅斯多個地區，包括布良斯克、莫斯科、圖拉、卡盧加、別爾哥羅德、庫爾斯克、奧廖爾、沃羅涅日，甚至遠至喀山達爾邊疆區等。

俄羅斯國防部聲稱，擊落咗144架烏克蘭無人機，呢次襲擊有可能成為戰爭以來最大規模之一。最多無人機係喺布良斯克州被擊落，共72架，其次係莫斯科州，有20架被擊落，而庫爾斯克州就有14架。

莫斯科州州長表示，喺拉緬斯科耶鎮嘅無人機襲擊中，一名46歲嘅婦女死亡，另外有三名平民受傷。拉緬斯科耶鎮位於莫斯科東南面46公里。

喺當地時間凌晨00:30左右，布良斯克州居民喺社交媒體上傳咗疑似爆炸聲嘅影片，聲稱當地有發生爆炸。稍後，莫斯科市長又聲稱有十幾架無人機被擊落，呢啲無人機被擊落時正前往莫斯科市中心嘅途中。

因為呢次襲擊，伏努科沃機場最少30班原本喺當地時間凌晨12點到早上7點之間起飛嘅國際同國內航班延誤。而莫斯科州嘅多莫傑多沃機場喺10日凌晨亦被迫關閉。圖拉州亦報告有兩架無人機被擊落，殘骸墜落喺一個能源設施上，但據俄羅斯官方媒體報道，無人受傷，供應亦冇中斷。

最近幾個月，烏克蘭軍隊加大咗對俄羅斯本土目標嘅襲擊，特別係希望破壞俄羅斯嘅石油工業同軍事生產設施。喺9月1日晚上，有數十架無人機針對俄羅斯多個地區，當時俄羅斯國防部聲稱擊落咗158架無人機。《I》