有一件事，香港人未必知道有幾緊張，但台灣人非常緊張，就係今年嘅九合一大選。我做新聞，日日睇台灣電視台，選舉新聞排山倒海，最近尤其不停講沈伯洋同蔣萬安。點解咁重要？因為如果民進黨今年贏到台北同新北，建立起雙北嘅地方執政基礎，2028年賴清德爭取連任，同民進黨攞返立法院多數，就會有非常重要嘅優勢。我認為，呢兩場仗足以影響台灣往後多年嘅政治格局。

本來我以為，民進黨喺台北好難選，甚至冇乜機會。民進黨候選人贏過台北市長，只有陳水扁嗰一次，1994年國民黨同新黨分裂，係重要條件。但沈伯洋竟然將聲勢帶起咗。佢有親和力、有政治魅力，落市場、去夜市，群眾熱烈歡迎。直接接觸佢，可能發現同以前聽到嘅形象唔一樣。「洋流」令原本覺得冇得選嘅人，開始覺得有希望。

上一次有咁強烈政治魅力、將選情翻轉嘅人，就係韓國瑜。2018年，佢竟然贏到高雄，民進黨長期執政、原本相當穩陣嘅地方。呢種政治浪潮，對對手係好可怕嘅，因為佢會令支持者由冇信心變有信心，由旁觀變成參與。

我講嘅係動員效果，唔係話沈伯洋一定贏。九月信民民調，蔣萬安四十一點七%，沈伯洋四十點五%，差距在誤差範圍。單一民調未定勝負，但蔣萬安唔可以再當台北係穩陣盤。地方選舉唔會直接改變總統同立法院，但市政府有龐大預算同行政能力。明年預算案，台北歲出約二千三百八十九億，新北約二千七百零一億，合計超過五千億新台幣。交通、教育、社福、住宅、建設，全部直接影響市民。掌握市政府，做出成績，建立信任，之後選總統、選立委，就有實在嘅政治本錢。

民進黨2014年地方大勝，攞到十三個縣市，之後2016年贏總統同國會多數；2018年反而係大敗。地方版圖可以建立有利條件。而家台灣經濟非常強。第二季按年增長十二點九三%，全年預測十一點零五%；八月出口創單月新高，首八個月出口增長四十四點二%，貿易順差按出口減進口計，約一千三百六十九億美元。景氣連續九個月紅燈，追平最長紀錄。

我喺台北親身感受到，好餐廳經常難訂位。有一批人消費力好強，雖然唔代表人人受惠。民進黨要乘勢，將經濟成績變成更多人感受到嘅生活改善。國民黨偏偏有整合問題。鄭麗文主導提名，但地方未必服佢；彰化王惠美多次缺席輔選，竹北藍白合作破局。對手有裂痕，自己有經濟順風，如果仍然突破唔到，就要檢討。

新北李四川行政經驗豐富，但首次參選。識做工程，同識動員、帶隊、應付選戰，係兩回事。蘇巧慧係三次選出嚟嘅立委，蘇貞昌又做過台北縣長，喺當地有多年人脈同組織。李四川有侯友宜支持，但仲要協調黨中央、地方同民眾黨。九月震傳媒民調，蘇巧慧三十八點二%，李四川三十七點一%，未分勝負，但新北有得打。

蔣萬安就食住蔣家後人嘅光環。呢段歷史我研究過，我唔接受「蔣經國個孫」係毫無疑問嘅定論。黃清龍考證指向郭禮伯，郭家亦願意驗DNA。未有鑑定，血緣未釐清，但既然身分有政治價值，就應該接受檢驗。

佢答問題亦有問題。議員問中央預算卡住，台北點應付，佢轉去講賴清德同民進黨以前點表決；記者問吸菸區拆完又重設係咪浪費，佢講無菸城市、聆聽意見；問會唔會同沈伯洋同台，佢回應英文卡詞，卻冇正面答同台嗰題。呢啲就係問A答B。

2024年哈佛演講嗰段片，連「政黨傾向」嘅英文都一時講唔出，同名校、矽谷律師嘅形象有落差。我係台北市民，我亦唔覺得佢市政有幾好。市長要回答具體問題，唔係背幾句專注市政就算。

最重要仍然係台灣安全。民進黨要贏總統同立法院多數，先有條件穩定增加國防投入，發展國防產業，動員台灣嚇阻中共軍事侵略。無人機條例過咗，唔等於裝備到位；經費卡住，戰力就難以按期建立。

我係贊成政黨輪替嘅。任何政黨長期執政，都需要監督。但台灣面對中共軍事威脅，無論邊個黨執政，保護自己個國家，都應該係共同底線。國家有危難，各黨可以爭論方法，但必須有團結對外嘅意志。

我最唔接受嘅，係國民黨入面有一派嘅路線：對中國嘅威脅講得輕，對美國嘅批評講得重，又支持刪減國防預算。國防採購當然要監督，但你反對一個方案，就要提出足以保護台灣嘅替代方案。唔可以一邊講和平，一邊令自我防衛準備停滯。

如果台灣自己都唔積極準備，美國協助台灣，政治上同軍事上都會更加困難。你自己都唔積極保護自己，點樣要求別人承擔風險嚟保護你？

所以雙北如果成為民進黨嘅執政基地，賴清德再連任，民進黨又取得國會多數，國民黨往後要挑戰佢，就可能長期處於劣勢。但真正值得支持嘅，係一個有競爭、有監督，同時有能力保護自己嘅台灣。今年呢場選舉，重要就重要喺呢度。