歐盟周三（7月1日）起正式對進口至歐盟嘅低價值電商包裹徵收3歐元（約27港元）費用，終結150歐元以下貨品免關稅嘅年代，被視為布魯塞爾遏制Shein、Temu同阿里巴巴旗下全球速賣通（AliExpress）等中國跨境電商「不公平競爭」嘅第一步。路透社報道指，對一直靠免稅優惠以超低價搶佔市場、因而急速膨脹嘅平台嚟講，係繼美國之後又一次重擊。

長期以嚟，歐盟對價值不超過150歐元嘅進口商品實行免關稅優惠，但近年享受豁免嘅電商包裹數量爆炸式增長，由2022年嘅14億件，急升至2025年嘅58億件，當中約九成一來自中國。歐盟委員會統計顯示，呢啲包裹最多有約65%存在申報不實或安全資訊未經核實嘅問題，令依足規矩交稅嘅歐洲零售商長期處於下風。負責關稅改革嘅歐洲議會議員戈廷克（Dirk Gotink）直言，喺過去嘅貿易環境下豁免係合理，但今非昔比，貿易格局已被電子商務、尤其係來自中國嘅電商徹底顛覆，佢批評豁免條款被大規模濫用，以犧牲歐盟企業利益為代價，換取競爭優勢。

根據新規，收費並非按每件包裹劃一計算，而係按包裹入面商品嘅海關稅則分類逐項徵收，每多一種分類就加多3歐元。舉例講，一個同時裝住衫、玩具同飾物嘅包裹要繳9歐元，但如果係多件同類商品，就只需付3歐元。措施適用於已喺歐盟進口一站式服務（IOSS）登記增值稅嘅非歐盟賣家，覆蓋約九成三嘅電商進口貨品。

業界普遍預計，新政策會推高跨境電商營運成本，部分費用勢必轉嫁畀消費者，令貨品加價。電商同航空貨運顧問羅辛（Derek Lossing）預計，措施生效後數星期內，進入歐盟嘅電商空運貨量可能下跌一至三成半，對全球航空貨運市場都會有影響。

面對新稅，各大平台早有部署。Shein此前已擴大喺波蘭嘅倉儲規模，改為更多以批量方式將貨物運入歐洲，減少由中國直郵畀個別買家；全球速賣通就表示，適用商品會標示價格已包含關稅同增值稅，其他商品會喺結帳前向消費者展示進口費用明細；Shein同Temu就未有回應置評請求。至於喺兩者崛起後推出超平價服務「Amazon Haul」嘅亞馬遜就強調，去年97%歐洲訂單由歐盟境內倉庫發貨，歐盟以外發貨嘅商品，顧客亦會喺結帳前見到進口費用。

歐盟今次其實係跟隨美國步伐。作為中國電商最大市場嘅美國，去年5月已終止對中國輸美商品嘅小額豁免關稅，8月底更取消所有進口商品嘅小額免稅待遇，變相令大量貨源轉攻歐洲，加速布魯塞爾出手。

值得留意，3歐元只屬過渡安排，預定2028年7月1日由按具體類別徵收嘅關稅取代，屆時新嘅歐盟海關當局將開始運作；歐盟同時仲討論緊另一項約2歐元嘅「手續費」，屬海關改革一部分，勢令業界成本壓力百上加斤。法國就宣布，因應歐盟稅項生效，即日起取消本國原有嘅2歐元小包裹費用，中小企業暨貿易部長巴潘（Serge Papin）形容屬「策略性暫停」。分析認為，隨住歐美先後封殺免稅小包裹，中國跨境電商靠「小單直郵」打天下嘅模式已近尾聲，平台勢必加快喺歐洲設倉本地化，而歐洲消費者網購「平到笑」嘅日子，恐怕亦買少見少。