蘋果正被記憶體嘅短缺逼到政治火線上。蘋果正游說特朗普政府，希望獲准向中國長鑫存儲採購記憶體晶片，以紓緩 AI 數據中心熱潮推高 DRAM 同儲存晶片價格帶來嘅成本壓力。問題係，長鑫存儲已被美國五角大廈列入「中國軍工企業」相關名單，蘋果今次唔只係同供應商講價，而係要白宮喺企業成本、消費者價格同國家安全之間作選擇。

事件嘅直接導火線，係蘋果6月25日提高 MacBook 同 iPad 價格。蘋果表示，AI 產業數據中心建設令記憶體同儲存晶片成本急升，公司已經無法再為消費者完全吸收成本；最低價筆電 Neo 起售價由599美元加至699美元，部分 MacBook Air、MacBook Pro 及 iPad Air 型號亦同步加價。蘋果股價當日下跌接近6%，市值蒸發約2630億美元。

這場壓力唔係蘋果一間公司嘅問題。AI 伺服器對高頻寬記憶體 (HBM) 同 DRAM 嘅需求大增，令美光 、三星同 SK 海力士等記憶體供應商，將產能同優先訂單更多投向 AI 晶片客戶，例如NVIDIA生態鏈。對手機、平板、個人電腦生產商而言，過去可以用規模同長約壓低成本；今日卻要同 AI 數據中心搶貨，消費電子變成供應鏈入面較弱勢嘅一方。

長鑫存儲正係喺這個缺口中被推上台前。中國證監會已批准 長鑫存儲 於上海科創板上市註冊，公司計劃集資295億元人民幣，上海證券交易所英文網站引述中國日報報道稱，長鑫存儲 係中國最大 DRAM 製造商，集資將用於 DRAM 技術升級同產能擴張。對北京而言，長鑫存儲 係中國半導體自主化嘅代表；對蘋果而言，長鑫存儲可能係降低記憶體成本、增加議價籌碼嘅新供應來源。

但政治風險正好喺呢度爆出來。美國五角大廈6月8日更新1260H名單，稱識別出188間符合「中國軍工企業」法定條件嘅實體；名單包括阿里巴巴、百度、比亞迪、蔚來、長鑫存儲同長江存儲等企業。被列入1260H名單本身並非全面制裁，但根據近年美國法律，五角大廈將逐步被限制同名單上企業直接簽約，2027年起亦會限制經第三方採購相關產品或服務。

亦解釋左點解蘋果要游說白宮，而唔係單純落單採購。有報道指，蘋果一個多月前已接觸美國商務部，並向政府內其他官員同華盛頓盟友游說。不過，事件仍未有定案；蘋果想要嘅，唔只是現時能否買貨，更可能係未來政策唔會突然轉向，令供應鏈再一次被出口管制切斷。

美國政壇反彈幾乎可以預期。眾議院美中戰略競爭特別委員會主席穆勒納爾 (John Moolenaar) 早前形容，更新後嘅名單係對美國企業、政府同民眾嘅警告，指相關中國企業正同中國軍方合作，損害美國國家利益。若白宮批准蘋果向 長鑫存儲採購，反對者會認為這等同用美國消費電子巨頭嘅訂單，間接壯大中國記憶體產業。

對蘋果嚟講，難題相當現實。唔加價，毛利率受壓；加價，消費者同投資者即時反應。唔引入新供應商，便繼續受制於三大記憶體巨頭；引入中國供應商，又會踩中美國國安紅線。這正係全球化供應鏈進入新階段嘅矛盾：企業追求最低成本，政府追求最高安全，兩者過去可以並行，今日卻愈來愈多時候互相衝突。