越共中央總書記兼國家主席蘇林周一喺紐約出席聯合國大會期間接受彭博電視專訪，表示越南同美國達成貿易協議已經「非常接近」，並承諾購買更多美國飛機等高科技產品，以縮窄雙方貿易失衡。佢同時明言，越南「唔接受貨物轉運」，貿易必須真實，產品要喺越南實際製造，並符合國際標準。

現年69歲、今年4月起同時兼任黨政最高職位嘅蘇林喺專訪中指，越方要同美國領導人、特別係美國總統討論嘅問題之一，係點樣加快談判，達成一項「對等、平衡且公平」嘅關稅協議。佢強調越南出口產品符合美國需求，同美國本土產品並無直接競爭；越方亦希望進口更多美國貨支持工業生產，包括飛機、核電設備以及公路同鐵路基建，但美方目前仍有一啲政策限制。

美方態度同樣正面。越南政府周二發聲明指，蘇林周一上午喺紐約會見美國貿易代表格里爾，格里爾表示雙方談判團隊已取得重大進展，距離最終達成協議「非常接近」，協議一旦簽署落實，將為兩國合作開闢新機遇。蘇林則促請美方以全面、整體嘅方式處理現存貿易問題，包括美方依據《1974年貿易法》第301條展開嘅調查，並希望盡早簽署協議。

越美談判已拖咗超過一年，轉運同非關稅壁壘一直係主要癥結。美方敦促越南加強原產地規則、海關執法以及對中國產原料嘅管控，因為華府擔心中國貨經越南重新包裝「洗產地」後再輸美。美國海關人員近月突擊抽查越南境內同中國有關聯嘅工廠，不過據悉暫未發現中國貨非法轉運嘅重大證據。

數字上越南嘅壓力並唔細。美國貿易代表辦公室數據顯示，2025年美國對越南貨物貿易逆差達1,783億美元（約1.39萬億港元），按年急增44.6%；戰略與國際研究中心（CSIS）更指，今年上半年美國對越逆差達1,260億美元（約9,830億港元），越南首次超越中國、墨西哥同台灣，成為美國最大逆差來源地。越南目前同時面對知識產權、產能過剩以及強迫勞動商品三項「301條款」調查，後者已令越南被加徵12.5%關稅。被問到有冇信心避過再加稅，蘇林話美方調查進展順利，初步結果呈正面。

特朗普本周四將喺華盛頓接待中國國家主席習近平進行國事訪問，蘇林揀喺呢個時間點釋出「協議在望」嘅訊號，反映越南想喺中美之間穩住位置。至於今次訪美會唔會同特朗普會面，蘇林未有明確表態。路透社早前引述文件指，美越企業預計周三喺紐約一場商業會議公布多達29項協議，包括越捷航空租賃22架飛機，不過大部分料屬不具約束力嘅意向書。

經濟方面，越南今年增長目標定喺10%以上，上半年實際增長8.18%，料為東盟最快。不過美國同伊朗嘅戰爭已接近七個月，越南八成以上原油依賴中東進口，能源價格高企持續推高通脹。蘇林對此依然充滿信心，話當局已對增長目標作出審慎測算，正推進體制改革同建立新增長模式。佢結束紐約行程後將轉往加拿大國事訪問，會晤總理卡尼，係兩國1973年建交以嚟越南最高領導人首次對加拿大作國事訪問。