美伊喺聯合國大會場邊重啟接觸之際，伊朗向美國拋出重開霍爾木茲海峽嘅方案。一名伊朗高級官員星期二向路透社透露，只要美國減輕軍事壓力、解除對伊朗港口嘅海上封鎖，伊朗可以喺七日內重開海峽，之後再重返談判，爭取永久結束敵對狀態。方案據報已透過卡塔爾調停人轉交美方，更有報道指，方案已獲最高領袖穆傑塔巴批准。

不過，伊斯蘭革命衛隊發言人莫赫比同日喺德黑蘭接受專訪，就擺出強硬姿態，話伊朗已經「提升」結束戰事嘅條件。佢指雙方6月17日簽署嘅協議本來已有共識，但美方單方面撕毀，「我哋唔係佢哋嘅玩物」。呢份由巴基斯坦斡旋嘅《伊斯蘭堡備忘錄》7月初已經瓦解，美伊互指對方違約，8月中正式屆滿。莫赫比表示，除咗原有嘅全面停火（包括黎巴嫩）、解凍資金同解除海上封鎖，伊朗而家更要求美方喺談判前，一次過釋放全數240億美元（約1,872億港元）凍結資產。

莫赫比又要求新協議必須加入解除也門封鎖嘅條款，所指嘅係沙特主導聯軍對胡塞武裝控制區港口同機場長達十年嘅封鎖。也門戰火喺7月重燃，胡塞武裝宣布封鎖沙特港口同船隻，本月更奪取扼守曼德海峽嘅丕林島，宣布除沙特船隻外其他船隻都可以通行。莫赫比就堅稱，胡塞係自己作主，唔使同伊朗協調。

霍爾木茲海峽方面，德黑蘭以安全同主權為由，要求過境船隻先獲伊方授權，並研究以「服務費」名義收費；早係3月，已有船隻被索取每程最多200萬美元（約1,560萬港元）。拒絕配合嘅船隻屢遭襲擊，美國則以封鎖伊朗港口及打擊沿岸還擊。美國財長貝森特上月聲稱，海峽兩年內會因陸上輸油管而變得無關重要；莫赫比就斷言海峽最少未來20年都無可替代，反問鋁材同化肥「點可以經輸油管運送」。佢又警告，美國如果再發動襲擊，伊朗今次唔會只係報復，而係會轉守為攻，令美國承受「前所未有嘅羞辱」。

另一邊廂，特朗普星期二喺第81屆聯合國大會發言時表示，自己面臨「重大決定」：同伊朗達成協議，定係「消滅伊斯蘭共和國」，但佢預料11月3日中期選舉一過就會成事。特朗普其後話，美國特使威特科夫 (Steve Witkoff) 同女婿庫什納 (Jared Kushner) 參與咗一場約三個鐘嘅會談，形容「非常好」，近期會再開會。威特科夫指會談由調停人喺兩邊之間穿梭傳話；伊朗官媒則指，外長阿拉格齊 (Abbas Araghchi) 喺會上重申解除封鎖、釋放凍結資產同全面停戰等條件。不過，莫赫比同日聲稱革命衛隊拒絕美方一切接觸，有中東媒體認為反映革命衛隊同外交系統之間存在張力。

市場方面，布蘭特期油星期二收報每桶99.25美元，連跌五個交易日。不過海峽航運仍然遠低於戰前水平，上週末只有17艘大宗商品船通過，戰前每日約有125艘大型商船往來。