美國三名民主黨資深參議員上周六（19日）致函國防部長赫格塞思，同上月初接替加巴德 (Tulsi Gabbard) 嘅國家情報總監克萊頓 (Jay Clayton)，要求監察長即時調查美軍多宗涉及人工智能嘅目標鎖定失誤，並提高透明度公開結果。有媒體披露，一份借助AI聊天機械人編寫嘅失實情報，今年春季險些令美軍武裝登上一艘中國船隻，知情人士形容「幾乎引發戰爭」。

有知情人士指，美伊戰事期間，一份喺美軍內部流傳嘅情報報告指，一艘身處中東嘅中國船隻正運送核武計劃部件。美軍隨即部署攔截，武裝人員準備登船，軍機亦已升空；直至行動前一刻，官員追查來源，先發現報告係特種作戰司令部一名分析員借助AI生成。該分析員用聊天機械人分析源自夏威夷太平洋特種作戰司令部嘅載貨清單情報，機械人混合公開資料同機密訊號情報後錯判貨物，分析員再用AI將結論包裝成標準情報報告。有消息人士直指報告「完全失實」，亦有知情者稱同類AI「幻覺」喺情報界並非孤例。

聯署嘅華納 (Mark Warner)、里德 (Jack Reed) 同庫恩斯 (Chris Coons) 喺信中表示，日益憂慮有關部門將加快採用AI同「試驗」置於有效管治之上，又警告AI目標鎖定平台屢因數據過時或純粹「幻覺」輸出錯誤結果，動搖國民同國際夥伴對美方情報嘅信心；信件要求讓監察長不受限制查閱今年兩宗經傳媒披露嘅個案，以及其他未曝光嘅同類事件。

另一宗個案，係2月28日開戰首日美軍戰斧導彈擊中伊朗南部米納卜一間小學，逾150人死亡，當中約120人係兒童。CNN 7月曾報道，美軍指揮官當時繞過多個數據庫（包括一個AI系統）發出嘅情報過時警告。彭博日前再引述參與五角大樓內部調查嘅官員指，事件源於「一連串本可避免嘅失誤」，包括衛星圖像過時，以及中央司令部人員過分依賴Palantir開發嘅Maven智能系統；Palantir回應指毋須為底層數據負責，亦無證據顯示軟件出錯。聯合國事實調查團上周四更指，有合理理由相信空襲構成戰爭罪，五角大樓完整報告就至今未公開。

就中國船隻事件，五角大樓發言人回覆美國傳媒Mediaite時表示，基於行動保安同既定政策，唔評論個別情報報告或所謂行動計劃，但強調會嚴格核實所有情報，負責任咁引入新技術。翻查資料，1993年「銀河號事件」中，美方同樣憑情報指中國貨輪運化武原料往伊朗，貨輪最終喺沙特阿拉伯受檢，證實並無相關化學品。

赫格塞思力推軍方採用AI，亦非一帆風順。AI公司Anthropic以模型未夠可靠為由，拒絕移除Claude嘅安全限制，唔容許軍方用於自主武器同大規模監控，其後被五角大樓列為「供應鏈風險」；加州聯邦法院上月27日裁定做法屬違法報復、下令撤銷，但五角大樓按另一條法例作出嘅同類認定仍然生效，案件仲喺華盛頓審理中。

國會方面，民主黨加緊要求規管AI，特朗普同眾議院議長約翰遜 (Mike Johnson) 等共和黨人就警告，放慢發展會令美國喺對華AI競賽中落後。眾議院外交事務委員會民主黨首席議員米克斯 (Gregory Meeks) 上周五亦牽頭，合共29名民主黨眾議員致函國務卿魯比奧同財長貝森特，促請同中方就AI安全展開持續對話。中國國家主席習近平預定本周三抵達華盛頓，周四同特朗普喺白宮會面。