美國司法部周一（9月14日）向紐約南區聯邦法院提交民事沒收訴狀，要求沒收約6,100萬美元（約4.76億港元）加密貨幣，指有關資金係伊朗經黑市出售受制裁原油同石油產品嘅收益，用嚟資助伊朗政府、軍方以及被美方列為恐怖組織嘅伊斯蘭革命衛隊。訴狀指控Blessed Trust同Hexa Whale兩間公司利用加密貨幣交易所幣安（Binance）嘅交易帳戶洗錢，將石油黑錢層層轉移，最終流向德黑蘭。司法部新聞稿形容兩者係「中國公司」，但訴狀第42段列明，Blessed Trust Limited同Hexa Whale Trading Limited均喺香港註冊成立，佢哋其中一名客戶「公司一」同樣係一間自稱經營國際石油業務嘅香港公司。根據本港公司註冊資料，Blessed Trust中文名為匯盈信托有限公司，2022年10月成立。

紐約南區聯邦副檢察官巴克利（Sean S. Buckley）表示，伊朗政府靠黑市售油養軍隊、扶植恐怖主義同發展核計劃及彈道導彈，並透過中國及其他地區嘅一批加密貨幣中介清洗咗超過15億美元（約117億港元）非法石油收入，今次行動就係要截斷呢條財路。

訴狀指，匯盈信托對外自稱財富管理或虛擬資產託管公司，實際係接收同轉移伊朗石油銷售所得，並提供將法定貨幣兌換成加密貨幣嘅「入金」服務，過程中用到美國嘅穩定幣發行商；Hexa Whale則標榜係大宗商品經紀，實際同匯盈信托協同運作。兩者客戶包括中國石油同石化企業，檢方指黑市伊朗油嘅主要買家正係中國嘅「茶壺」獨立煉油廠。文件披露，「公司一」2024年3至4月經紐約一間銀行嘅美元代理帳戶向Hexa Whale電匯約3,715萬美元，2024年11月至2025年3月再向匯盈信托支付約4.43億美元（約34.6億港元）。檢方又追蹤到一組至少七個非託管錢包地址，統稱「實體A」，累計收發超過15億美元伊朗石油收益，資金流向伊朗交易所Nobitex同中東疑似革命衛隊白手套嘅匯款商，其中一個地址據報屬伊朗武裝部隊總參謀部前線公司Sepehr Energy嘅恐怖融資網絡。

今次追討嘅係10個TRON鏈地址內合共約6,119萬枚USDT，發行商Tether早於2025年6月同7月已凍結有關地址，並會銷毀舊代幣、重新發行等值代幣轉入FBI控制嘅硬件錢包。不過民事沒收訴訟針對嘅係資產本身，暫未見任何個人或公司喺本案被刑事起訴，司法部亦強調所有指控喺法庭裁決前只係指控；截至發稿，兩間公司未有公開回應。

幣安並非被告，訴狀亦無指控幣安有不當行為。幣安行政總裁鄧偉政（Richard Teng）周二喺X平台強調案件唔係針對幣安，公司對違反制裁零容忍，從未容許同受制裁人士交易，並一直配合執法部門。不過兩間公司早喺今年2月已經曝光：《紐約時報》報道幣安內部合規人員發現約17億美元（約133億港元）加密貨幣經平台流向伊朗相關實體，《華爾街日報》同《財富》雜誌則指提出警告嘅調查員其後被解僱；民主黨參議員布魯門塔爾（Richard Blumenthal）隨即代表參議院常設調查小組委員會去信幣安索取紀錄，並質疑幣安同特朗普（Donald Trump）家族加密貨幣業務嘅關係。幣安3月回覆指有關報道失實同出於政治動機，否認因此解僱員工，並稱已分別喺2025年8月同2026年1月終止Hexa Whale同匯盈信托嘅帳戶。幣安2023年曾就違反反洗錢同制裁法例認罪、罰款43億美元，創辦人趙長鵬（Changpeng Zhao）服刑四個月後，去年10月獲特朗普特赦。今次司法部出手，正值美伊今年開戰、停火安排7月破裂後衝突持續之際，華府一邊同伊朗交火，一邊循金融渠道追截伊朗油錢，而兩間香港註冊公司點解可以成為呢條黑錢鏈嘅中轉站，本港監管機構暫未見公開回應。