南韓國會「國民同意請願」網站8月31日公開一項名為「要求禁止中國人免簽入境及加強外國人入境審查與犯罪管理」嘅請願，截至上周六（12日）中午已有超過5萬1千人聯署，跨過移交國會委員會審議嘅門檻。按制度，公開請願喺30日內獲5萬人支持，就會交由相關常任委員會審查，今次請願嘅聯署期限係9月30日。

請願人以保障國民安全為理由，要求廢除中國公民嘅免簽入境政策，並全面加強所有外國人嘅入境審查、在韓管理同犯罪資訊共享，又主張對犯下重罪被遣返嘅外國人長期或永久禁止再入境，並建立整合出入境部門、警方同檢方資料嘅統一管理制度。請願書引述統計指，隨住在韓外國人增加，2024年外籍犯罪嫌疑人達35,296人，按年增加6.8%，當中中國籍比例較高，但強調「唔係要排斥外國人」，而係要建立以國民安全為先嘅正常出入境管理體系。

值得留意，南韓現行嘅並非個人免簽，而係只限指定旅行社組織、3人以上嘅中國團體遊客，最多免簽停留15日。措施由2025年9月29日起實施，原定今年6月30日屆滿，法務部6月底表示實施期限會同中國對南韓國民嘅免簽期限睇齊，即延至今年12月31日，總理金民錫6月喺大連會晤李強時亦提及延長半年。法務部數據顯示，截至6月21日經免簽入境嘅中國團客約10.4萬人，脫團只有21人，比率0.02%。

今次聯署急速升溫，同濟州島近期嘅治安恐慌直接相關。8月22至24日三日之間，4名早前報失蹤嘅人士先後喺濟州被發現死亡，其中5月失蹤嘅37歲女子張美蘭，負責警員未確認佢下落就結案，事後查出該警員經手近300宗失蹤案、涉嫌大量虛假結案，8月25日遭法院批准羈押。網上隨即流傳「器官販賣集團」、「特定國家同警方勾結」等講法，甚至「3年失蹤3000人」，但所謂3000人只係2023年至今年7月嘅累計報案數，仍未尋獲嘅成年人只有15人，4宗死亡個案未證實有關連，亦無證據涉及外國人。加上濟州近年確有多宗中國人之間嘅暴力案件，例如去年2月一宗涉及虛擬貨幣交易嘅酒店劫殺案，恐慌情緒令反免簽嘅聲音一發不可收拾，國會網站另有請願要求廢除濟州特別自治道嘅免簽制度。

數據同民意之間明顯有落差。警方2025年5月公開嘅統計顯示，2024年有768名外國人涉嫌殺人、搶劫、強姦等重大暴力罪行，中國人佔256人、即33.3%，但在韓中國人接近96萬、佔外國人36%，按人口比例計算，中國人嘅犯罪率其實低過南韓本地人。不過警察廳本月8日向執政黨共同民主黨議員提交嘅資料就顯示，截至8月12日，喺境外犯罪後潛逃南韓嘅外國人共110人，中國籍40人佔36%最多，其次係烏茲別克、蒙古同越南，罪名以詐騙居多；京畿南部警方8月初就拘捕一名1997年喺天津犯下劫殺案、2017年入境後非法居留嘅50幾歲中國男子，並將佢遣返。

濟州嘅「中國現象」係另一爭議焦點。根據濟州特別法規，外國人可免簽入境濟州最長30日，免簽入境者當中98%係中國人，但唔可以離開濟州前往其他地區；當地2010年起推行投資移民，投資5億韓元以上嘅休閒設施可獲居留資格，維持5年後可申請永久居留，門檻2023年提高至10億韓元（約港幣560萬），2019至2023年入境嘅投資者接近九成係中國籍。大批中資地產項目湧現，部分至今爛尾，據報引起當地居民同規劃專家憂慮。

反對中國團客免簽嘅請願其實唔係第一次跨過5萬人門檻，2025年2月同類請願同樣獲移交國會，政府當年9月照樣推行免簽。今次請願最終被採納定係廢棄，仍要視乎委員會審議，喺中韓關係改善、互免簽證嘅基調之下，李在明政府點樣回應民間嘅治安焦慮，係下一步嘅觀察重點。