上月喺北京舉行嘅第二屆世界人形機械人運動會，北京人形機器人創新中心（X-Humanoid）嘅天工Ultra機械人以9.39秒跑完100米，快過保特（Usain Bolt）2009年創下嘅9.58秒人類世界紀錄，之後喺複賽更跑出8.86秒。外人只係睇到科技Show，但有調查報道指，解放軍立刻實用化：運動會閉幕兩日後，《解放軍報》即發文呼籲科研人員「把科研課題對準戰場難題」，令實驗室入面嘅「機器人」真正成為能打勝仗嘅「戰鬥員」。

有媒體翻查超過100份解放軍招標書、學術研究、專利、官方刊物同國防企業資料，結論係中國國防體系正加速研究人形機械人嘅軍事用途，並為日後戰時部署做準備，相關工作喺2025至2026年明顯提速。採購紀錄反映呢個方向：2025年5月解放軍招標採購一部人形機械人連安裝及技術培訓；今年6月再預留約30萬美元（約234萬港元），建立一套收集同標註鏡頭、雷達及動作數據嘅系統，包括機械人可通過嘅地形資料。

最具體嘅作戰構想來自國防科技大學西安測試中心2025年8月一篇論文：六部「作戰機器人」，包括人形機械人、機械狗或無人車，分配畀兩支突擊小隊，配合地面部隊逐層逐間房清除被敵軍佔據嘅建築物，作者預計相關裝備5至10年內可以到位，但論文冇講明交戰規則、攜帶咩武器或者遇到平民點處理。《解放軍報》2025年7月一篇文章更提出人形機械人嘅任務應由輔戰演進到主戰，並討論「賦予機器人開火權」，例如發現敵方有生目標後須經人工驗證先可以開火。去年12月，解放軍東部戰區發布一段人工智能生成嘅影片，畫面係人形同四足機械人喺假想衝突中突破台灣防線。

到今年，研發已由軍事院校擴展到國防工業。國有嘅中國兵器工業集團（Norinco）8月公布嘅資料稱，全尺寸人形機械人「伏羲」可執行哨衛、全天候偵察、智能巡邏同高危任務，並可配合公司嘅遙控系統由人手操作，繞過機械人要完全自主決策呢個最大難題。

不過並無證據顯示解放軍已將武裝人形機械人部署到作戰部隊，機械人依然高耗能，離開受控演示可靠性成疑。卡內基梅隆大學機械工程教授約翰遜（Aaron Johnson）指戰場變數太多，機械人難以應付；澳洲戰略政策研究所高級分析員戴維斯（Malcolm Davis）認為人形機械人目前唔算實用嘅戰場系統，但5至10年後好可能會係。軍事科學院戰爭研究院研究員王永華去年11月撰文亦承認軍事應用「有更長的路要走」，但一旦技術突破、成本大降同量產，人形機械人「將會源源不斷投入戰場」。

呢場競賽並非中國獨有。美國陸軍去年啟動比賽發展「軍事化人形能力」，最多10隊決賽隊伍今年同美軍專家測試系統，後續合約最多125萬美元（約975萬港元）。但據美國銀行全球研究部數據，中國廠商佔2025年全球人形機械人出貨量約95%，美國產業遠遠落後。華府7月底已由聯邦通訊委員會（FCC）出手，以國家安全為由禁止新款外國製人形同四足機械人進口，五角大樓亦將宇樹科技（Unitree）列入涉軍企業名單。中國國防部發言人蔣斌今年3月曾表示，中方始終認為人工智能軍事應用應堅持由人主導，仲警告算法掌控生殺大權可能令《終結者》場景成真，呢啲關注並冇阻止中國探索人形機械人嘅軍事用途。