美國退役四星上將、前中央情報局局長彼得雷烏斯（David Petraeus）周二（9月1日）喺英國上議院發表「上議院議長講座」演說，呼籲英國成為第一個按烏克蘭戰場經驗全面重組國防體制嘅西方主要國家，並帶領北約迎接戰爭形態嘅根本轉變。

今次演說由2月上任嘅上議院議長福賽思勳爵（Lord Forsyth of Drumlean）邀請。彼得雷烏斯形容烏克蘭係「界定二十一世紀戰爭形態嘅軍事實驗場」，真正值得西方研究嘅，唔單止係無人機、人工智能同電子戰等個別技術，而係感應器、軟件、無人系統、戰場資訊同工業產能點樣結合。戰場資訊正以前所未見嘅速度轉化為行動，商業科技直接進入戰場，軟硬件同戰法喺開戰期間不斷修改，改變嘅唔只係武器，而係「戰爭概念本身」。

佢強調，重大軍事變革好少由購買新裝備開始，而係由新思想開始；改革最大障礙往往唔係錢，而係制度慣性、既得利益，同埋唔願質疑長久以嚟嘅假設。

彼得雷烏斯同時罕有地公開批評美國，承認美國仍然擁有全球最具活力嘅創新生態，但尚未發展出現階段所需嘅「革命性新戰爭概念」，更未展開相應嘅編制、訓練、採購同人事改革。換言之，美國唔係缺乏科技，而係未能夠以足夠速度將科技轉化成新嘅作戰體系。佢以2006年美軍嘅反叛亂改革做比較，形容當年已經算大刀闊斧，但同今日所需相比只屬「溫和」。

佢亦提到踏入第七個月嘅美伊衝突，指出壓倒性嘅技術優勢，如果冇清晰政治目標，未必能夠轉化為決定性嘅政治成果；該衝突本周再度升級，美伊雙方喺區內互相開火。彼得雷烏斯亦重申反對2021年全面撤出阿富汗，認為當時西方駐軍已經降至相對有限而可持續嘅規模。

佢認為，英國雖然面對嚴重財政壓力，但自俄羅斯全面入侵烏克蘭以嚟，已經展現較早辨認戰略現實並果斷行動嘅能力，有條件帶領北約改革；北約嘅作戰總部、部隊組織、訓練同採購制度亦必須同步改變。

不過，英國自身嘅國防承諾近月風雨飄搖。前首相施紀賢帶領英政府6月30日公布《防務投資計劃》，2026/27至2029/30年度合共安排2,980億英鎊（約3.16萬億港元），較2025年《開支檢討》增撥150億英鎊（約1,590億港元），但當中47億英鎊（約498億港元）嘅來源要留待今年預算案先交代。時任國防大臣賀理安（John Healey）6月因不滿撥款不足請辭，成為施紀賢下台嘅導火線之一；7月20日接任首相嘅貝安德（Andy Burnham）隨即委任賀理安做財相。

北約7月嘅估計顯示，英國2025年國防開支佔GDP 2.3%，2026年料升至2.6%，計劃本身預計2027/28年度達2.7%。政府一直承諾下屆國會任期內達到3%，並按北約要求喺2035年達到3.5%。貝安德7月底已拒絕承諾2030年前達到3%；周三（9月2日）首次出席首相答問，佢承諾全額落實計劃，並會喺明年開支檢討交代2035年達標路線圖，但仍被下議院國防委員會主席當面警告，國防政策「單靠感覺唔夠」。

彼得雷烏斯最後警告，軍事轉型已經喺烏克蘭、俄羅斯同中東展開，西方面對嘅選擇唔係改唔改，而係主動帶領，定係日後被迫追趕。