新學年開學，家庭與學校合作事宜委員會9月1日發布《小學概覽2026》，多間傳媒按概覽統計，全港約448間官立及津貼小學喺2026/27學年合共縮減逾140班小一，扣除17間學校新增嘅18班後，淨減125至126班，係近年最大規模嘅縮班潮，約為上學年淨減10多班嘅十倍。有統計指，全港官津小學小一班數由上學年1,558班跌至今學年1,432班，跌幅達8%。

黃大仙區嘅慈雲山天主教小學由上學年5班小一縮至只開兩班，係全港縮班最多嘅學校。同時，新學年有61間小學只開辦一班小一，較上學年多14間，另有90間只開兩班，兩者合計佔全港官津小學三分之一。

分區方面，18區之中除咗灣仔區之外，其餘17區都要縮班。葵青區係「重災區」，區內31間官津小學有14間縮班，合共減少約17班；屯門及東區緊隨其後，各減13班，元朗、沙田及觀塘亦各減逾10班。擴班學校寥寥可數，位於西貢區安達臣道發展區、上學年先啟用嘅安博官立小學，小一由1班增至3班，係全港唯一擴兩班嘅學校。

縮班潮嘅根源係本地出生人數「斷崖式」下跌。2020年受社會事件及新冠疫情影響，本港出生嬰兒數目按年急跌近兩成至約4.3萬，正正係今年升讀小一嘅一批；2021至2023年出生人數更進一步跌至3.2萬至3.7萬左右。教育局今年4月向立法會財委會提交嘅推算顯示，居港6歲學齡人口將由今年約4.7萬人，持續下跌至2029年3.15萬人嘅低位，跌幅達33%，要到2033年先回升至約4萬人。

教育局今年3月已公布，多達15間小學因小一收生不足16人「開班線」而獲派「0班」，包括14間津校及1間官校。據5月底嘅資料，當中8間選擇同其他學校合併，包括特首李家超母校五邑工商總會學校及大角咀鮮魚行學校；兩間將開辦「私小一」，一間受惠新政策獲豁免，其餘4間包括筲箕灣官立小學，將逐步停辦或最遲喺2029/30學年結束營辦。

津貼小學議會顧問張作芳形容今年減班數目「真係多嘅」，但指業界已有心理準備。佢引述當局文件指，明年6歲學齡人口將跌至約4萬，預料「派0班」嘅學校會更多，跌勢會持續至2029年，期望2030年或之後先有緩和。佢又指葵青、屯門及東區均屬早期發展地區，人口老化問題較嚴重，無足夠生源供應所有學校，期望人才子女來港等措施有助補充學生人口。

教育局局長蔡若蓮9月1日出席觀塘一間小學開學禮後回應指，學齡人口下降係結構性問題，當局已推出各項措施，以「軟着陸」為策略同目標，協助學校循序漸進調整班數，去年唔少獲派0班嘅學校已透過合併匯聚資源。不過對於《小學概覽》涉及幾多學校減班，佢未有正面回應。蔡若蓮今年3月曾表示，過往嘅「軟着陸」措施已消化至「退無可退」，必須更積極主動應對，並推出「升級併校」計劃，鼓勵學界及早規劃合併，強調合併係為咗升級而唔係救校。