美國司法部宣布，俄亥俄州立大學同意支付210萬美元（約1,638萬港元），就涉嫌申請美國太空總署（NASA）同國家科學基金會（NSF）經費時冇披露僱員同中國嘅關聯及資助嘅民事指控達成和解。事件核心人物係已離職嘅大地測量學教授沈嗣鈞（C.K. Shum），佢曾參與中國「千人計劃」。

根據司法部新聞稿同和解協議，涉事撥款期由2012年11月至2023年8月，NASA同NSF均要求申報首席研究員所獲外國政府資助，聯邦法律自2011年起亦禁止NASA撥款用於同中國、中國高校或中資企業合作。司法部指，沈嗣鈞最遲由2014年起已喺校內年度教職員活動報告申報佢喺中國高校及國家科研機構出任客座或顧問職位，但校方一直冇轉交NASA或NSF。2019年9月校方得悉並獲沈嗣鈞承認參與千人計劃，但要到2023年先通知兩間機構，同時先展開正式紀律程序。協議亦點名沈氏實驗室另一名成員Yu Zhang等人同樣有中國關聯或獲中國資助。

沈嗣鈞係美國科學促進會院士，曾任聯合國政府間氣候變化專門委員會第四次評估報告主要作者，專研衛星大地測量同全球海平面變化。佢2019年刊於校方網站嘅履歷列明，佢自1999年起擔任中國科學院國家天文台顧問，其後陸續出任紫金山天文台、西南交通大學、中科院測量與地球物理研究所同河海大學客座教授；同一份履歷亦顯示，佢自2012年起係香港研究資助局物理科學小組成員，並曾於2013至2016年出任香港理工大學土地測量及地理資訊學系外部評審委員。

和解金額全數列為賠償，校方早於2024年1月已退還約25.5萬美元（約199萬港元），餘下約188萬美元（約1,470萬港元）須喺協議生效後七日內繳付。協議列明校方否認指控，和解唔構成承認責任，但美國政府保留根據《虛假申報法》追究、刑事追究以及向包括沈嗣鈞在內嘅個人追責嘅權利，校方並須配合對未獲豁免人士嘅調查。

司法部民事司助理司法部長舒梅特（Brett Shumate）表示，受惠於聯邦科研資助嘅美國大學，必須喺申請中全面披露所有外國資金。NASA監察長辦公室高級官員斯泰諾（Robert Steinau）就話，和解連同相關合規協議發出明確信息，當局唔會容忍機構隱瞞外國關係、損害國家安全。新聞稿又提到，特朗普政府今年成立咗打擊欺詐特別工作組同國家反欺詐執法司，加強打擊聯邦項目嘅欺詐、浪費同濫用。

校方就強調自己係主動處理。據法廣引述校方聲明，校方自行發現並調查沈嗣鈞不當嘅外國從屬關係，主動向NASA同NSF報告，並暫停佢嘅首席研究員資格、停用相關撥款、啟動紀律程序及退還款項，沈嗣鈞現已唔再受僱於該校。校方又指已於2019年修訂披露程序，要求申報同外國人才計劃相關嘅外部關係。

呢次並非該校首次為同類問題付出代價：2022年11月，校方已就另一名教授隱瞞參與外國人才計劃及外國資助，支付87.6萬美元（約683萬港元）和解；2021年5月，該校一名前風濕免疫科教授亦因隱瞞參與千人計劃、向美國國家衞生研究院作虛假陳述，被判囚37個月。