Microsoft共同創辦人Bill Gates喺個人網誌Gates Notes發表近6,000字長文，題為〈動盪嘅AI時代已經嚟到：我哋而家嘅抉擇至關重要〉，警告即使喺最好嘅情況之下，過渡至人工智能時代都會係「人類歷史上最動盪嘅時期之一」，批評各國領袖、專家同社會至今冇計劃應對。呢篇係佢三年嚟首篇AI長文，立場較2023年「風險可控」嘅樂觀論調明顯轉向。

Bill Gates形容，人工智能「要麼係史上最偉大嘅平等推手，要麼係最惡劣嘅不公義來源」，並列出三大風險：大規模而永久嘅職位流失、令不法分子更易作惡，以及損害兒童發展同人際關係。佢預計法律、醫療、客戶服務、軟件同製造業十年內受重大衝擊，初級同中層職位首當其衝，「好多工作將會永遠消失」；模型愈嚟愈強大，「可能開始違背我哋嘅利益，我哋可能會失控」。

就業方面，Bill Gates倡議設立「人類專屬」（Human Reserved）工作範疇。佢話呢個名令佢諗起自然保護區：有啲地方明明起得樓、起得路，但人類選擇唔起，因為損失太大。佢以2020年因認知障礙症離世嘅父親為例，指當年照顧者嘅付出「係無可取代嘅人性，機械人做唔到，亦唔應該做」；但佢承認各地取態唔同，勞動力萎縮嘅日本就可能歡迎護理機械人。Bill Gates仲用聊天機械人Claude推演方案，研究以縮短工時、提早退休等方式，令人類保留約四成工作。

稅制方面，Bill Gates聯同Anthropic、OpenAI等公司嘅倡議，主張向機械人同AI「代幣」（token，AI處理數據嘅基本單位）徵稅。佢指出：「而家僱主請人，要為員工薪酬交稅；買機械人就通常可以即刻當營業開支扣稅，稅制變相推你用機器取代人。」佢認為徵稅可以稍為減慢企業棄用人力，並為再培訓同社會安全網集資。

制度層面，Bill Gates指AI挑戰遠超「9·11」之後嘅改組，當年美國政府進行二戰以嚟最大重組，都只係為國家安全一項職能，AI就會波及就業、教育、稅務、選舉、公共衞生以至金融體系，需要新嘅國內統籌機構同國際組織，「美中之間需要一定程度嘅合作」。據報佢嘅團隊正安排11月同國家主席習近平會面。

Bill Gates又憶述西雅圖童年：「細個我朋友唔多……我落咗好多苦功、靠母親好多幫助，先培養到社交能力，70歲嘅今日仲受用。」佢擔心AI伴侶令下一代錯過呢種磨練。佢接受訪問時直言業界正逐一跨過昔日設下嘅警戒線：「我好震驚，我竟然係第一個企出嚟話『咁樣係癲㗎』嘅人」，並引述科技高層私下互相提醒「咪講住，我哋仲想集資多一萬億美元」（約7.8萬億港元）。不過華盛頓大學榮休教授埃齊奧尼（Oren Etzioni）反駁，話Bill Gates斷症啱但藥方大多錯，token稅只會推高美國AI成本，將用戶推向更平嘅中國模型。