中國全國人大常委會星期二（8月25日）首次審議《反跨境腐敗法》草案，為當局跨境追逃追贓同海外執法提供更清晰嘅法律基礎。分析普遍認為，作為內地資金出海嘅第一站，香港嘅豪宅、新股以至名錶珠寶市場，都可能成為執法焦點，而市場嘅憂慮情緒，或會早於法例真正落實之前已經浮現。

草案共六章四十七條，內容涵蓋反跨境腐敗工作嘅原則、範圍同主張，明確工作機制同職責，強化案件辦理同國際合作，並訂明企業廉潔合規義務同法律責任；官方形容立法係要豐富追逃追贓同辦理涉外腐敗案件嘅法律「工具箱」。國際律師行HFW合夥人Karen Cheung向南華早報表示，法例旨在為內地當局追查涉境外元素嘅貪腐案件提供更明確法定依據，加強國際合作同海外追贓；一旦資產同內地調查扯上關係，名貴奢侈品、優質物業以及複雜嘅公司同信託架構，都可能受到更嚴密審視。

立法背後係國家主席習近平持續升級嘅反腐運動。中央紀委國家監委今年1月通報，2025年全國紀檢監察機關共處分98.3萬人，當中包括69名省部級或以上幹部。金融系統更加係重災區：中證監前主席易會滿舊年9月被查，今年4月被開除黨籍同公職；前副主席方星海喺7月24日宣告落馬，連同2025年4月被查嘅另一前副主席王建軍，中證監短短15個月內已有三名正副主席級人物先後出事。

香港對內地資金嘅倚重，令新法嘅潛在漣漪效應不容忽視。差餉物業估價署數據顯示，本港樓價上半年累升7.88%，連升13個月，係2018年中以嚟最長升浪；南華早報引述瑞銀估計，內地買家佔住宅成交金額最多達33%。新股市場同樣熾熱，安永統計上半年港交所共迎來84隻新股，集資約268億美元（逾2,000億港元），按年急升92%，全球排名第二，僅次於6月迎來SpaceX巨型上市嘅納斯達克。另外，波士頓諮詢公司5月發表報告指，香港2025年跨境財富管理規模增長10.7%至2.95萬億美元（約23萬億港元），首次超越瑞士（2.94萬億美元）成為全球最大跨境財富管理中心，當中約六成資金嚟自內地。

事實上，新法出台之前，北京已經連環收緊離岸資產稅網。財政部同國家稅務總局7月24日公布離岸信託個人所得稅規則，財產轉讓所得按升值部分徵收20%；8月初《財新》再報道，北京、杭州等地稅務部門據報已開始對境外保單分紅等收益徵收20%個人所得稅，消息一度令友邦保險單日收市急挫5.9%，保誠喺倫敦嘅股價更曾瀉13%。SPI資產管理管理合夥人Stephen Innes指出，每當北京擴大對離岸資金嘅執法範圍，內地富裕買家就會轉趨審慎，豪宅決策放慢，名錶珠寶等高檔消費亦見收斂，市場往往喺規則真正實施之前，已經對審查嘅恐懼作出反應。

不過，巴克萊喺星期二發表嘅報告認為，相關舉措反映內地正走向更強嘅稅務合規同離岸財富監管，並唔係逆轉整體開放路線，目標係更有效監察跨境資金活動，同時繼續支持具戰略意義嘅對外投資。喺內地資本外流加速、財政壓力上升嘅背景之下，香港呢個「超級聯繫人」嘅金融韌性，正迎嚟新一輪制度考驗。