俄烏戰事持續約四年半，烏克蘭總統澤連斯基上周末向傳媒透露，烏方已聯同美國同歐洲官員，將結束戰爭嘅構想整合成一頁文件，準備提交俄羅斯，並認為由今年12月喺美國舉行嘅二十國集團（G20）峰會起，直至2027年夏季完結，係美國斡旋停戰嘅機會窗口，因為2028年美國總統大選選戰屆時將會展開。

澤連斯基表示，文件包含三大構想：第一係停火，屬於整份文件嘅主要重點；第二係美方早前提出、喺烏東頓巴斯（Donbas）設立自由經濟區嘅方案，即俄烏雙方對等後撤兵力，喺當地形成緩衝區，交由第三方管理，惟具體由邊個負責管治仍未有定案，佢形容呢個模式「複雜但公平」；第三部分就涉及歐盟同北約日後扮演嘅角色，以及烏克蘭準備採取乜嘢行動配合。佢強調三項構想並非烏方單方面主意，而係烏、美、歐共同擬定，部分內容更源自美方談判代表同俄烏雙方先前嘅會談。呢份文件係澤連斯基同美國特使威特科夫（Steve Witkoff）以及特朗普女婿庫什納磋商後整理而成。

不過克里姆林宮周二（25日）隨即潑冷水。發言人佩斯科夫（Dmitry Peskov）聲稱，頓巴斯係「俄羅斯聯邦領土、俄羅斯聯邦主體」，第三方幾乎冇可能管治俄羅斯嘅地區，變相否定自由經濟區構想。俄羅斯已將佔領主張寫入憲法，聲稱擁有烏克蘭四個州份，惟實際上並未完全控制；莫斯科一再堅持，任何解決方案都必須包括烏克蘭全面割讓四州，並處理衝突嘅所謂「根源問題」。佩斯科夫仲聲稱，俄方睇唔到以和平方式結束戰爭嘅出路，所以先會繼續作戰。

美國斡旋嘅俄烏和談今年年初一度密集展開，1月下旬三方喺阿布扎比舉行開戰以嚟首輪三邊會談，2月17至18日喺日內瓦更首次將領土問題擺上談判桌，但因烏克蘭拒絕俄方進一步割地要求，加上華府全力應對同伊朗嘅衝突，雙方3月中確認談判押後，此後陷入停頓。澤連斯基本月較早前已表示，烏方向美方提交咗新提案，惟一直冇公開細節，直至今次先披露內容。

至於佢口中「機會窗口」嘅起點，即今年12月14至15日喺佛羅里達州舉行嘅G20峰會，場地為特朗普名下嘅邁阿密多拉爾（Doral）高爾夫球度假村。戰場上，俄軍現時嘅首要目標係奪取頓巴斯餘下地區，持續向烏東多座城市組成嘅「堡壘帶」推進，惟喺康斯坦丁尼夫卡（Kostiantynivka）一帶只能靠高傷亡嘅步兵滲透逐吋前進，令外界關注莫斯科會唔會有誘因返上談判桌。