中國就業市場持續疲弱之際，北京大學國家發展研究院經濟學教授、副院長張丹丹一句「靈活本身就是一種福利」，連日嚟喺內地輿論場掀起軒然大波。事緣佢早前參與《財經》雜誌前總編輯王波明主持嘅訪談節目《聊一波》，被問到靈活就業群體有咩社會保障時表示，從勞動經濟學角度睇，靈活本身就係一種福利；正規工作雖然有五險一金，但係要犧牲自由、朝九晚五先換得到，而靈活就業者要嘅係自由度、係時間自主嘅選擇權，代價就係社保相對薄弱，因為佢哋自己管自己，冇單位需要為佢哋交社保。

相關片段經短視頻平台剪輯後迅速廣傳，隨即引發巨大爭議，更被罵上熱搜，大批網民斥責呢番言論係現代版「何不食肉糜」，其中一句獲最多點讚嘅留言係「讓她也靈活就業吧」。有微信公眾號文章指出，喺各大平台接單嘅網約車司機、快遞員同外賣員，一舉一動都受演算法監控，佢哋嘅「靈活」並非主動選擇，而係別無選擇；亦有評論質疑，公務員退休金以萬元計，農村老人每月養老金得兩三百元人民幣，將夾喺中間、乜保障都冇嘅零工人群講成「已經被福利」，係極之涼薄。網上仲流傳一句辛酸自嘲：「我喝西北風是因為沒錢，而不是正在減肥。」

連一向為官方立場辯護嘅《環球時報》前總編輯胡錫進都表明無法接受，形容張丹丹當時可能「腦子短路」，認為佢或許應當回應輿論，該解釋嘅解釋、該致歉嘅致歉；不過胡錫進同時強調，張丹丹過往為維護靈活就業群體權益付出大量努力，呼籲外界唔好一筆抹殺。亦有辯護者指出，完整片段入面張丹丹承認有啲人係冇得揀，佢過往仲多次呼籲完善零工社保，並建議由平台或政府補貼兩至五成社保費用，質疑風波源於片段被斷章取義後放大。

事件反映內地民眾對就業不穩嘅深層焦慮。中國新就業形態研究中心六月發表嘅《2025中國藍領群體就業研究報告》估計，內地靈活就業人數將由2025年嘅2.8億增至今年嘅3.2億，佔城鎮就業超過四成，十年間增長超過兩倍，涵蓋外賣員、網約車司機、快遞員、保安、保潔等，普遍冇底薪、冇帶薪假，唔少人因為要全額自費索性放棄參保。值得留意嘅係，張丹丹本身長期研究零工經濟，曾指官方公布嘅2025年青年失業率18.9%並未涵蓋1600萬隱性失業青年，真實就業壓力遠高於數據，正因如此，唔少人先至覺得呢句「福利論」格外刺耳。有評論同時指出，歐盟2024年已通過《平台工作指令》，推定平台工人為僱員並限制演算法話事權，反觀內地學界對工會同集體談判等關鍵議題長期避而不談，先至係真正問題所在。