伊朗貨幣里亞爾兌美元匯價跌至歷史新低，自由市場開市報202萬里亞爾兌1美元，官方中央銀行匯率則約為150萬，惟民眾日常兌換以市價為準。匯價暴瀉之際，美國財長貝森特同日喺華盛頓召開記者會，正式公佈代號「經濟放逐行動」（Operation Economic Outcast）嘅新一輪制裁，亦即總統特朗普早前揚言嘅「經濟D日」（economic D-Day），聲言要「切斷伊朗每一條經濟命脈」，直至伊朗政權完全孤立為止。

貝森特宣佈，二級制裁範圍將擴大至數碼資產、科技、黃金、航空同航運等領域；財政部同日將近60個涉及核計劃與導彈技術採購、網絡行動及石油走私嘅實體、個人同船隻列入制裁名單，據報當中包括多名中國公民。佢又點名伊朗最大國營銀行梅利銀行（Bank Melli），要求其遍佈十多個國家嘅分行全部「關門熄燈」，否則將被逐出美元體系，並預告本星期內會再制裁一間大型金融機構。貝森特透露，特朗普正親自致電多國領袖，提出「具體要求」，促請各國停止同伊朗政權貿易。佢日前喺英國《金融時報》撰文，聲言特朗普已重創伊朗經濟，令里亞爾跌至史上最弱、通脹處於罕見高位。上星期，長期係伊朗最大貿易夥伴之一嘅阿聯酋已率先宣佈，暫停同伊朗所有貿易及金融往來。

伊朗方面反應強硬。中央銀行行長赫馬提（Abdolnaser Hemmati）回應指，美國制裁招數「早已用盡」，新措施並無帶嚟額外壓力，又話伊朗自2月開戰以嚟已囤積外匯，可確保必需品同藥物供應。外交部發言人巴加伊（Esmail Baghaei）就警告，局勢任何升級「必然帶嚟後果」，強調「我哋雙手並冇被綁住」。

自美國同以色列2月28日空襲伊朗以嚟，戰事已接近半年，伊朗經濟受制裁同美軍海上封鎖夾擊：米價升咗約六成，牛肉價格更飆逾1.5倍；國際貨幣基金組織（IMF）預測，伊朗今年經濟將收縮超過5%，全年平均通脹率或高達68.9%。德黑蘭市面有市民排隊用積蓄搶購美元，73歲嘅馬哈茂迪（Sadegh Mahmoudi）坦言：「協議同和平，已經冇希望。」

不過，經濟重壓暫時未轉化成政治讓步，伊朗手握霍爾木茲海峽呢張王牌，開戰前全球五分之一海運石油經此輸出，如今航運近乎停頓，伊朗更要求船隻申請許可並繳交過路費，拒絕全面重開海峽。阿曼外長布賽迪（Badr Albusaidi）星期二訪問德黑蘭，商討兩國共同管理海峽方案，據報談判已到最後階段；6月曾斡旋達成60日停火嘅巴基斯坦，星期一亦派高層代表團赴伊朗磋商止戰。有華府制裁專家質疑，今次措施「算唔上經濟D日」，實際殺傷力成疑；亦有美媒分析指，制裁料成為11月美國中期選舉前華府嘅主要施壓手段，選後唔排除重啟軍事行動。