美加貿易戰急速升溫。美國總統特朗普喺自家社交平台Truth Social發文，威脅由2027年1月1日起，將加拿大輸美嘅所有汽車、貨車、汽車零件同鋼鐵關稅上調至50%，令上星期破裂嘅雙邊談判雪上加霜。目前美國對加拿大汽車嘅最高關稅為25%，鋼鐵關稅本身已經係50%，特朗普未有講明鋼鐵稅率會否進一步倍增，亦冇交代符合《美墨加協議》嘅汽車產品會否繼續獲豁免。

特朗普喺帖文指控「加拿大多年嚟一直佔美國便宜」，聲稱加方對美國農產品徵收「高得離譜」嘅關稅，造成600億美元（約4,680億港元）貿易逆差，形容情況「不可持續，唔會再容忍」。佢又揚言「喺美國設廠就零關稅」，強調「加拿大唔會再被當成一個州咁對待」，更寫道「我哋唔需要加拿大，係佢哋需要我哋」。

呢輪威脅之前，雙方談判上星期五深夜破裂，美國對約200億美元（約1,560億港元）加拿大貨品徵收嘅50%關稅隨即喺星期六凌晨生效，涵蓋冰球棍、水泥、酒類同部分衣物等，約佔加拿大對美出口5%。加拿大總理卡尼批評新關稅係「一次誤判」，指談判破裂源於美方最後關頭嘅「權力遊戲」，包括要求限制加拿大同其他國家簽訂貿易協議嘅能力，仲有觸及加拿大文化、語言同主權嘅條款。卡尼宣布9月8日起「一美元對一美元」反制，針對美國鋼鐵、乳製品、家電、農業設備、紙漿紙品同電子產品。

安大略省省長福特（Doug Ford）星期一接受美聯社訪問時更加火上加油，話美國已故總統列根如果知道特朗普嘅貿易政策，「會喺幅畫度嘔喺佢身上」，直言列根會對特朗普「感到噁心」，特朗普辦公室內正正掛住一幅列根畫像。福特威脅一旦貿易戰惡化，安省會切斷輸美電力同關鍵礦產：「我會斷佢哋貨，安大略連一粒沙都唔會俾佢哋攞到」，又指控特朗普想「榨乾加拿大每一個產業」。福特去年曾經喺電視廣告引用列根反關稅言論，激嬲特朗普一度中斷談判。

美方就企硬。美國貿易代表格里爾聲稱華府曾提出調低鋼鐵、汽車同木材關稅，但加方「唔想要」呢份協議，並揚言會就加拿大嘅反制採取進一步措施；佢強調新關稅僅佔美國整體消費0.06%，「唔預期有重大影響」，雙方目前冇再安排任何會談。美加去年貨品同服務貿易總額達8,800億美元（約6.86萬億港元），加拿大近72%貨品出口銷往美國，而北美汽車供應鏈高度融合，車輛組裝期間往往要多次跨境，關稅戰一旦全面開打，最終恐怕係兩地消費者埋單。