美國同加拿大嘅貿易談判上星期五深夜破裂，華府隨即喺美東時間星期六凌晨零時起，對約200億美元（約1,560億港元）嘅加拿大貨品開徵50%關稅，涵蓋葡萄酒、乳製品、蜂蜜、水泥、傢俬、服裝、釣具以至冰球用品等數百項產品，約佔加拿大對美出口5%；能源、鉀肥、魚類、關鍵礦物，以及已按232條款另行徵稅嘅鋼鐵、鋁材同汽車等則獲豁免。加拿大總理卡尼宣布，9月8日起實施「一美元對一美元」嘅等額報復，目標包括美國鋼鐵、乳製品、家電、農業設備、紙漿紙張同電子產品，雙方暫時冇再安排任何談判。

特朗普今次引用1930年《關稅法》第338條。呢條屬於「斯姆特—霍利」法案嘅條文，容許總統對歧視美國商業嘅國家徵收最高50%關稅，沉睡近一個世紀從未真正用嚟開徵關稅。今年2月，美國最高法院裁定特朗普早前引用緊急權力全面加稅屬越權，政府自此一直另覓法律依據。關稅原定上星期三生效，特朗普一度以雙方「已有協議」為由延期三日，仲喺Truth Social暗示被拜登叫停嘅Keystone XL輸油管「可能死而復生」、有望納入協議，點知最後一刻全盤破裂。

雙方互相指責。卡尼批評華府臨門一腳提出「不經濟、不公平」嘅新條件，包括削減加拿大汽車嘅關稅寬免、限制加拿大同其他國家簽署貿易協議，甚至威脅到法語同魁北克文化，直言美方「要求太多、讓步太少」，「將經濟一體化武器化」，協議「簽名係用鉛筆寫嘅」；佢形容加拿大「被攻擊」，「畀人攻擊嗰陣，你就係處於戰爭狀態」，又強調永遠唔會畀美國「獨家取得」加拿大嘅關鍵礦物。美國貿易代表格里爾就反駁，話美方已提出削減鋼鐵、汽車同木材關稅，係加拿大唔肯接受，華府只係回應加方一年以嚟嘅報復，並會有進一步反制。安大略省長福特（Doug Ford）力撐卡尼拒絕協議，卑詩省長尹大衛（David Eby）更話，若果接受限制對外簽貿協嘅條款，加拿大就會淪為「經濟上嘅第51個州」。

美加經貿唇齒相依，今年上半年雙邊貿易額達3,760億美元（約2.93萬億港元），係美中貿易嘅兩倍，僅次於墨西哥；加拿大逾七成貨品出口銷往美國。特朗普星期日喺Truth Social發文，話「加拿大想要成為一個州嘅好處，但又唔想成為一個州」；加拿大民間反美情緒就持續升溫，溫哥華同滿地可嘅美職聯賽事上周末再有球迷向美國國歌喝倒采，要求驅逐美國大使霍克斯特拉（Pete Hoekstra）嘅網上請願已收集近24.8萬個簽名。卡尼承認報復措施會令加拿大人成本上升、選擇減少，有經濟學者估計，關稅若持續，加拿大或流失近9萬個職位；而喺11月中期選舉前，關稅推高物價亦勢必為特朗普帶嚟政治壓力。事件令《美墨加協議》嘅檢討前景更添變數，卡尼直言「美國已經變咗」，兩國「唔會再返去舊有嘅關係」。