中美AI晶片攻防再添一單羅生門。美國科技媒體《The Information》周四（8月20號）引述兩名Nvidia員工報道，指呢間美國晶片巨頭計劃喺今年年底前，開始向中國客戶小批量供應一款專為中國市場設計嘅人工智能晶片，並稱已有數家中國客戶落單。不過Nvidia同日火速潑冷水，發言人指有關報道「並不正確」，強調公司目前喺中國市場並無任何LPU銷售，產品路線圖上亦冇中國特供版LPU。

據報道，涉事產品係Nvidia語言處理器（LPU）嘅一個版本，用嘅係從人工智能晶片初創格羅克 (Groq) 授權而嚟嘅技術，可以同Nvidia圖形處理器協同運作，加快AI聊天機械人嘅回應速度。Nvidia去年12月底同Groq簽訂非獨家技術授權協議，據報以約200億美元（約1,560億港元）現金成交，係公司史上最大宗交易，Groq創辦人羅斯 (Jonathan Ross) 及總裁馬德拉 (Sunny Madra) 已率團隊過檔Nvidia。《The Information》又指，由於新一代Vera Rubin系統受美國出口限制無法輸華，Nvidia已修改軟件，令LPU可以配搭中國市場買得到嘅處理器運行；呢款晶片本身符合美國出口管制，但北京會唔會放行喺內地銷售，仍係未知之數。

翻查資料，3月已有消息報道，Nvidia正準備一個可以喺中國銷售嘅Groq晶片版本，惟當時消息人士話產品「並非降規、亦唔係中國特供」，同今次「特供」講法有出入，或者正係Nvidia否認嘅着力點；有美國科技媒體亦留意到，Nvidia聲明集中講「目前」狀況，未有完全封死日後變陣嘅空間。Nvidia喺AI訓練晶片市場一枝獨秀，但喺增長更快嘅推理市場面對更激烈競爭，百度等多間中國科企已自研推理晶片；行政總裁黃仁勳5月更坦言，公司已「大致上」將中國AI晶片市場讓咗畀主要對手華為。

事件同H200解禁風波一脈相承。呢場由美國總統特朗普去年12月拍板、華府每宗交易抽佣25%嘅解禁，拖到最近先見真章：美方5月批准阿里巴巴、騰訊、字節跳動等有限度採購H200，惟直到最近先開始交貨，字節同騰訊各收到約一萬粒。與此同時，北京據報一直勸喻企業慎買美國晶片、將大部分算力留喺境外，為國產晶片爭取追趕時間。喺呢個夾縫下，外界自然揣測Nvidia想借LPU另闢蹊徑，重返呢個一度佔公司總收入13%嘅市場。

市場反應方面，據報消息一度刺激Nvidia股價由跌轉升，其後回軟，一度倒跌半個百分點。公司下星期三（8月26號）美股收市後公布季度業績，繼上季收入約816億美元（約6,360億港元）後，今季指引約910億美元（約7,100億港元），LPU傳聞同中國業務去向，勢成分析員追問焦點。