已解散嘅支聯會、前主席李卓人（69歲）同前副主席鄒幸彤（41歲），被控煽動他人顛覆國家政權罪，三名《香港國安法》指定法官李運騰、陳仲衡及黎婉姫今日（21日）早上喺西九龍法院裁定三者罪名成立；連同開審前已認罪嘅前副主席何俊仁，四名被告全部罪成。案件今年1月開審，前後審訊24日，5月完成結案陳詞；唔認罪受審嘅李卓人同鄒幸彤就本案已還押逾4年11個月，何俊仁亦已還押近1,600日。

法庭裁決時表明，唔接納兩人所指五大綱領中嘅「結束一黨專政」唔係要結束中國共產黨嘅領導地位，亦唔接受佢哋對中國共產黨冇敵意；法庭唔認同被告嘅言行係合法行使言論及表達自由，更唔信納佢哋真誠相信支聯會嘅支持者唔會採取非法手段終結中共執政地位。判詞又指，中國憲法確立咗中國共產黨嘅領導地位，唔存在西方式政權輪替嘅可能，推翻共產黨即係推翻或破壞中國嘅根本制度；法庭考慮被告嘅公開言論同六四紀念館，信納「結束一黨專政」綱領嘅目的就係結束中共領導。

控方審訊時指，「結束一黨專政」嘅自然及合理效果就係「結束中國共產黨領導」，屬以違反中國憲法（特別係第一條同序言）嘅非法手段推翻憲法確立嘅根本制度；被告唔單止喺悼念活動挑起他人情緒，更意圖煽動、並相信他人會從事顛覆國家政權嘅行為，超越法律界線，至於被告係咪衷心追求民主或平反，就與案無關。辯方一直反駁，五大綱領環環相扣、唔係針對任何政黨領導，同一句口號喺唔同場合有唔同效果；支聯會提出嘅頂多係口號，從來冇提出任何具體行動教香港市民點樣「結束一黨專政」，不足以構成「推翻」。鄒幸彤更喺結案陳詞直言，支聯會就係要結束一黨專政、要民主轉型。

支聯會1989年5月成立，五大綱領依次為「釋放民運人士」、「平反八九民運」、「追究屠城責任」、「結束一黨專政」同「建設民主中國」，過往每年六四都喺維園舉辦燭光晚會；警方國安處2021年8月去信支聯會，指有合理理由相信佢係「外國代理人」並索取資料，支聯會同年9月表決解散。李卓人、何俊仁、鄒幸彤2021年9月10日首度提訊後還押，何俊仁2022年8月一度獲高院批准保釋，其後被指違反條件遭撤銷擔保。案件原定2025年5月開審，兩度押後至今年1月先正式開審。

根據《香港國安法》第23條，煽動他人實施顛覆國家政權，情節嚴重可判監5年以上、10年以下；情節較輕則可判5年以下監禁、拘役或者管制。法庭將另行處理求情及判刑，截稿前判刑日期未有公布。