美國對伊朗嘅「經濟戰」全面升級。美國總統特朗普周三（8月19日）喺Truth Social發文，揚言對德黑蘭發動「史上最具毀滅性嘅經濟行動」，形容係「經濟版D-Day」；財長貝森特周四再加碼，宣布美國將對伊朗實施「史上最嚴厲制裁」，並會喺下周一（8月24日）開記者會公布細節。佢仲點名中國，聲稱北京一半能源來自海灣地區，「配合行動對中國大有好處」。

特朗普喺帖文警告，任何國家若果容許旗下金融機構、企業、機場或政府實體向伊朗提供「任何形式嘅生命線」，都會面臨重大經濟後果，並要求立即終止石油走私、換匯安排、現金轉移、船舶登記同空殼公司等活動，仲留低一句「你哋知道我講緊邊個」。貝森特接受CNBC訪問時形容，封鎖加制裁係「組合拳」，直言措施「會奏效，我哋會令呢個政權垮台」，又警告各國「係時候作出選擇」，「你哋要麼同我哋一齊，要麼同我哋作對」。

中國作為伊朗最大貿易夥伴，被視為首當其衝。根據能源分析公司Kpler 2025年數據，中國買咗伊朗海運出口石油超過八成；據報2024年伊朗對外貿易有逾四分一同中國進行。不過中國同時係美國重要貿易夥伴兼關鍵稀土供應國，華府若果向北京開刀，隨時招致反制。中國外交部發言人林劍周四喺例行記者會回應指，制裁施壓無助於問題嘅解決，呼籲相關各方採取負責任舉措，通過政治外交途徑解決問題。

伊朗反應強硬。外長阿拉格奇（Abbas Araghchi）喺X發文，指所謂「經濟D-Day」係轉移美國自身危機嘅視線，包括史無前例嘅國債同飆升嘅利息開支，美國聯邦債務周二啱啱突破40萬億美元（約312萬億港元）歷史高位。伊朗外交部周四發聲明，斥美國新制裁係「經濟恐怖主義」同「危害人類罪」，強調會用一切手段捍衛國家主權同利益。

今場由二月底爆發、美國聯同以色列對伊朗開戰嘅衝突已近半年。雙方六月中達成嘅60日停火及談判框架，本周一屆滿而冇達成最終協議，特朗普確認目前冇任何談判、亦無意延長；但佢女婿兼特使庫什納（Jared Kushner）一日前先至話，美方同伊朗政府各方面嘅接觸「比以往任何時候都活躍」，講法自相矛盾。美軍現時封鎖伊朗港口，德黑蘭就被指襲擊霍爾木茲海峽商船，據報周二有商船遭不明彈體擊中，一名船員傷亡。伊朗第二大貿易夥伴阿聯酋，周二偵測到兩枚據稱由伊朗發射嘅彈道導彈墮海之後，宣布無限期暫停同伊朗所有貿易、商業同金融往來，伊朗否認發射導彈。

戰事同時拖累美軍全球部署。「喬治華盛頓號」航母已抵達中東，接替連續部署超過260日、破紀錄240幾日冇靠港嘅「林肯號」，令西太平洋罕有地出現冇美國航母嘅真空期。布蘭特期油周四一度升穿每桶93美元，逼近94美元，創7月底以嚟新高；貝森特就話油市「誤解」咗施壓含義，指極限經濟施壓意味大規模軍事行動好可能唔會重啟，但強調呢個判斷只適用於目前情況。距離美國中期選舉不足三個月，特朗普喺外交同軍事均無進展之下，正孤注一擲打經濟牌。