德國正面對一個相當矛盾嘅勞動市場局面：一方面因人口老化長期缺乏技術人才，另一方面人工智能急速進入企業日常運作，隨時改寫大量工種。德國勞動市場與職業研究所（IAB）、聯邦職業教育與培訓研究所（BIBB）同經濟結構研究公司（GWS）嘅情景分析指出，未來15年約有160萬個職位會因人工智能而消失或新增，但整體就業數字大致平衡；期間國內生產總值每年可額外多增長0.8個百分點，15年累計創造約4.5萬億歐元（約41萬億港元）額外產值。當中IT同資訊服務業預計淨增約11萬個職位，企業服務等文職後勤就可能流失約12萬個。轉型其實已經展開：IAB另一項調查顯示，2025年德國接近四分之一企業已使用生成式人工智能，兩年前呢個比例仲只係5%，其中200人以上大企業使用率高達48%。

美國嘅數據就更令人擔憂。史丹福數碼經濟實驗室經濟學家布林約爾松（Erik Brynjolfsson）團隊本月發表嘅最新修訂研究顯示，22至25歲、從事受人工智能影響較大職業嘅年輕僱員，就業水平已較同齡但較少受影響嘅同儕落後約19%，差距由去年首次公布嘅16%持續擴大；相反，同類職業入面嘅資深員工就業大致穩定，反映人工智能首當其衝嘅係啱啱入行嘅職場新人。

不過亞洲亦有相反例子。日本野村證券8月初發表嘅亞洲經濟月報統計，2022年至今年8月期間，印度與人工智能相關嘅新招聘達83,100個，因人工智能流失嘅職位就係31,921個；亞洲整體新增約130,758個職位、流失約60,654個，惟超過九成新職位集中喺科技行業，約六成流失職位嚟自金融服務業，初級職位需求明顯萎縮，形成「兩層勞動市場」。

至於中國，情況就最為嚴峻。官方全國總工會調查顯示，內地新就業形態勞動者已達8,400萬人，佔全國職工約兩成，包括外賣員、網約車司機等；中國新就業形態研究中心估計，2025年靈活就業人口達2.8億，預計2026年升至3.2億。呢類過去被視為基層「安全網」嘅體力勞動崗位，而家同樣受自動化步步進逼：京東（JD）同美團據報已測試無人車同機械人送貨。武漢大學、清華大學同美國杜蘭大學（Tulane University）團隊分析武漢逾20萬條每日觀察數據，發現百度無人駕駛的士Apollo Go投入服務後，傳統的士司機平均日收入短期下跌10.9%，同時工時更長、壓力更大、工作滿意度下降。學者警告，未來真正嘅問題唔係人工智能會唔會令所有人失業，而係邊個能夠適應轉型，邊個會被擋喺就業市場門外。