美國總統特朗普喺美韓年度聯合軍演「乙支自由之盾」(Ulchi Freedom Shield) 開鑼前僅數小時，突然喺社交平台Truth Social發帖，表明已指示戰爭部長赫格塞斯「大幅縮減」演習規模。佢話演習唔單止成本高昂，「而且一如以往，大部分費用由美國埋單」，仲會向北韓發出「完全不恰當、充滿敵意」嘅訊號；佢強調只要佢在任，北韓一直「恭敬、不構成威脅」，又搬出自己同北韓領導人金正恩嘅「非常好關係」做理由。特朗普仲喺帖文加插一筆，話「雖然似乎有啲唔相關」，佢早前問過南韓總統李在明想唔想加入美國「推動伊朗伊斯蘭共和國無核化」，對方答「唔使喇，多謝！」，將縮減軍演同首爾拒絕參與伊朗戰事直接掛鈎；由於演習已太遲取消，先至改為下令縮減。

今年「乙支自由之盾」一連11日舉行至8月27日，約1.8萬名南韓軍人參與，規模同往年相若，重點演練應對無人機、GPS干擾同網絡攻擊，並汲取北韓士兵援俄參戰嘅經驗；目前約2.85萬美軍駐紮南韓。南韓國防部證實演習周一如期展開，據南韓傳媒報道，首爾至今未接獲美方正式縮減要求。李在明辦公室回應話，美韓一直就聯合演習緊密協調，並會繼續咁做；青瓦台方面亦期望「特金」友好關係可以促成有意義對話，推動半島和平穩定。五角大樓發言人就拒絕交代縮減實際點執行，將問題推畀白宮。

決定一出，華府兩黨齊聲開火。參議院軍事委員會民主黨首席議員里德 (Jack Reed) 斥之為「特朗普同佢混亂政府又一個愚蠢而草率嘅決定」，直指「當總統為討好獨裁者而削減軍演，或者因南韓拒絕加入一場由佢挑起嘅戰爭而懲罰對方，我哋所有盟友同對手都會認定美國嘅承諾可以講價」，又話金正恩「贏咗場宣傳勝利」，南韓「純粹因為特朗普嘅自負而受罰」，警告中俄正睇住呢位總統幾容易棄盟友於不顧，下次試探美國時會記住。共和黨參議員蒂利斯 (Thom Tillis) 亦開腔，指南韓70幾年嚟都係擁有精良軍力嘅堅實盟友，削減軍演「只會令數以千計北韓士兵騰出手，協助普京對無辜烏克蘭平民進行有系統嘅綁架、酷刑、強姦同謀殺」。眾議員賈亞帕爾 (Pramila Jayapal) 質疑呢位「想做威權統治者」嘅總統，為咗佢欣賞嘅北韓模式捨棄南韓民主，形容決定對地區穩定「危險」；另據法廣報道，參議院情報委員會副主席華納 (Mark Warner) 亦拍片質問特朗普「究竟企喺邊一邊」。

平壤暫時未就縮減決定表態，但北韓外務省上星期先至將軍演鬧成「侵略戰爭嘅預演」，揚言以「新層次威懾」反制，本月初仲試射咗兩枚彈道導彈，係6月底以嚟首次。有分析認為特朗普此舉係想引金正恩重返談判桌，雙方核談判2019年破裂之後，金正恩一直無意重啟，去年9月更放話要美國先放棄對北韓無核化嘅「妄想執念」。前美軍太平洋司令部情報中心主任舒斯特 (Carl Schuster) 就潑冷水，指演習大部分開支早已支出，臨門縮減慳極有限，取消咗嘅訓練遲早要補返，否則戰備隨時受損。