美國陸軍今年較早時喺德國舉行代號「聯合決心」（Combined Resolve）嘅大型演習，同烏克蘭無人機操作員正面交鋒，結果美軍慘被對方輕易偵測同「擊潰」。演習於4月9日至5月10日喺德國霍恩費爾斯（Hohenfels）訓練場舉行，約3,500名美軍參與，事件反映美軍喺前線小型無人機作戰上，同實戰經驗豐富嘅烏軍仍有一段距離。

今次參演美軍主力係由德州胡德堡（Fort Hood）輪調到歐洲嘅第一騎兵師第三裝甲旅級戰鬥隊，佢哋按演習設定要進攻假想敵陣地，而防守一方就獲得烏克蘭無人系統部隊第412「復仇女神」（Nemesis）旅嘅操作員增援。有參演人員向該報透露，美軍重型裝甲車推進時揚起大片塵土，喺烏軍偵察無人機面前無所遁形；烏方操作員隨即出動投彈無人機同第一人稱視角（FPV）自殺式無人機模擬攻擊，過程冇使用實彈，只要無人機極近距離逼近目標就計算為「命中」。結果進攻部隊被「殲滅」嘅速度快到，主辦方要不斷將已判定被毀嘅單位當成新增援重投戰場，演習先至維持到落去。

值得留意嘅係，參演美軍其實配備咗標準電子戰及反無人機系統，但依然難以招架。美國陸軍官員承認，部隊喺兩星期內反覆重演攻防場景後表現逐步改善，學識更有效分散、偽裝同運用電子戰裝備；烏軍中途更轉換陣營，協助美軍學習喺進攻行動入面運用無人機技術。不過有在場人士直言，美軍操作員缺乏喺炮火下維修同掛載無人機嘅經驗，同打咗四年幾仗嘅烏軍相比明顯係「新丁」。

原來，美軍並非首支敗喺烏克蘭無人機手下嘅北約部隊。2025年5月，烏軍無人機操作員喺波羅的海地區演習中，輕易擊敗英國、愛沙尼亞以至美國分遣隊等北約部隊；今年春天由瑞典主導、聯同北約盟國喺哥特蘭島舉行嘅演習，烏方同樣大獲全勝。華府智庫戰略與國際研究中心（CSIS）學者科恩（Eliot Cohen）表示，近年戰場經驗證明各類無人機對現代戰爭至關重要，「美軍必須掌握呢種能力，但好可惜，目前睇嚟並非咁樣」。

德國演習嘅挫敗，加上美軍今年喺中東戰事中因伊朗長程無人機襲擊而有士兵死傷、飛機被毀，揭示五角大樓近年雖然斥資數以十億計美元採購無人機同反制技術，防禦漏洞依然明顯。美軍喺對伊朗戰事中已損失大約四分之一嘅MQ-9「死神」無人機機隊。

面對差距，華府正加緊向基輔「取經」。國防部長赫格塞斯5月向參議員表示，已增派美軍人員前往烏克蘭研習無人機作戰；特朗普7月8日喺安卡拉北約峰會上一改過往輕視態度，表明美國會購買烏克蘭無人機，仲話「有咗呢單交易，我哋就有極佳保護」。烏方7月22日已同意向美國出口無人機，參與五角大樓嘅「無人機主導權」（Drone Dominance）計劃，該計劃斥資10億美元（約78億港元），目標2027年前採購20萬架無人機；總統澤連斯基（Volodymyr Zelenskyy）7月24日透露協議已經「落實」，潛在合約總值可能高達100億至300億美元（約780億至2,340億港元）。不過特朗普8月13日簽署公告，對部分敏感進口無人機及零件徵收最高100%關稅，措施會唔會波及美烏協議暫時未明，為呢單「雙贏交易」再添變數。