全球暖化令北極冰層加速消融，中國航運業就趁勢開闢新財路。上海貨櫃航運企業海杰航運（Sea Legend）本周正式開通全球首條定期穿越北極嘅貨櫃航線，每周一班來往寧波舟山港同英國最大貨櫃港費利克斯托（Felixstowe），取道俄羅斯北岸嘅北方海航道，將傳統經蘇伊士運河約40日嘅航程縮短近一半至約20日。

首航貨輪「迪拜塔」號（Dubai Tower）載箱量1,740個標準貨櫃，據報周二已靠泊舟山裝貨，預定周六（15日）啟航，公司仲將航線命名為「冰上絲綢之路」，官方名稱係「中歐北極快航」。 北方海航道貨櫃船過境次數由2024年嘅15次，增至去年破紀錄嘅23次，英國南安普敦大學研究亦發現，2024至2025年間北極冬季海冰峰值下跌5.8%，係有紀錄以嚟最大跌幅，令夏季部分航段毋須破冰船護航都可通行。

不過就規模而言，新航線暫時係象徵意義大於實際。有營運商預計，8至10月北極航季期間可運載約2萬個標準貨櫃、即約24萬噸貨物，同每年至少1,500萬個標準貨櫃經蘇伊士運河由中國轉運相比，可謂微不足道；航線亦受季節限制，今年最後一班船10月3日離開寧波，10月24日抵達費利克斯托之後就要停航過冬。

分析普遍認為，地緣政治考量先至係重點。中東局勢持續動盪，胡塞武裝間歇性襲擊令曼德海峽同紅海航運風險高企，而中國超過一半出口貨物都要途經蘇伊士運河，繞道北極既慳時間，又避開咽喉要道。保險公司安聯海事風險顧問主管卡納（Rahul Khanna）表示，北極同北方海航道嘅交通量明顯增加，船東視之為機遇，既可節省大量時間同成本，亦可以完全避開地緣衝突海域。

另一方面，任何穿越北極嘅航行都必然要俄羅斯合作。中國國家主席習近平2017年已同俄羅斯總統普京（Vladimir Putin）提出共建「冰上絲綢之路」，北方海航道由俄羅斯國家原子能公司（Rosatom）營運核動力破冰船隊，中俄2024年成立北極航道合作分委會，去年更商定共同建造高冰級貨櫃船。加拿大魁北克拉瓦爾大學地理學研究主任拉塞爾認為，新航線應主要被視為中俄「利益交匯」：莫斯科早已利用呢條航道運輸「幽靈船隊」油輪，仲希望擴大破冰船護航規模。

風險同爭議亦都唔少。安聯統計顯示，過去十年北極圈錄得超過500宗航運事故，近半涉及機械損壞或故障，航行仲面對冰封、GPS失靈同搜救資源不足等問題。環保方面，加拿大前環境部長吉爾博（Steven Guilbeault）向警告，全球暖化對北極嘅影響已經相當驚人，船隻愈嚟愈多會令當地安全風險加劇研究亦指航運噪音會滋擾鯨魚、海象同海豹，一旦漏油，油污更可能被困喺海冰之中，後果不堪設想。