歐洲智庫「歐洲外交關係委員會」（European Council on Foreign Relations，ECFR）上星期四（8月6日）發表評論文章，引述最新民調指，喺15個受訪歐洲國家之中，德國民眾對中國嘅態度最為質疑。40%德國受訪者視中國為需要競爭嘅對手，另有9%更認為中國係處於衝突狀態嘅敵手，合計49%，比例冠絕全歐；排第二嘅法國，兩項數字分別為35%同8%。相比之下，西班牙只有14%受訪者當中國係競爭對手、4%視為敵手，意大利亦僅得19%同5%。

正面觀感就啱啱相反。35%德國人認為中國係必須策略合作嘅夥伴，遠低於西班牙嘅56%同意大利嘅51%，法國就係33%。連埋視中國為盟友嘅受訪者計，只有38%德國人對華持正面睇法，西班牙同保加利亞就分別高達65%同62%。政黨取態方面，執政基民盟同社民黨嘅支持者入面，唔少於六成視中國為對手或敵手；反而極右另類選擇黨（AfD）嘅支持者對北京最友善，45%當中國係必要夥伴，仲有5%視之為盟友。

ECFR分析，「中國衝擊」係德國民意轉向嘅關鍵：2019至2025年間，德國製造業流失大約42萬個職位，而家仲以每月一萬個嘅速度繼續蒸發，當中以車廠付出嘅代價最大。德國一直係中國喺歐洲最大嘅貿易同投資夥伴，但形勢近年急速逆轉。福士（Volkswagen）行政總裁奧博穆（Oliver Blume）上月24日喺業績電話會議促請歐盟，盡快研究對中國製插電式混能車加徵關稅；據統計機構Dataforce數據，今年上半年中國品牌已搶佔歐洲插混市場28.3%份額，福士Tiguan由銷量榜首跌落第四，被比亞迪Seal U等三款中國車型爬頭。

政策風向同樣轉變。今年5月，法國、意大利、立陶宛、荷蘭同西班牙聯手促請歐盟委員會，加快對華貿易防禦行動，德國當時唔單止拒絕加入，仲主張同北京深化工業聯繫；但到6月歐盟峰會，各國領袖喺柏林默許之下，通過強化對華貿易防禦工具，包括「買歐洲貨」條款同限制高風險中國技術。法國總統馬克龍去年12月亦曾揚言，短期內會對華加徵關稅。ECFR結論係，德國總理默茨領導嘅政府一旦改行對華強硬路線，毋須擔心選民反彈；加上57%德國人支持投資可再生能源，全歐受訪國平均更有61%認同，柏林大可將對華「去風險」同能源轉型雙軌並行，一次過處理兩大難題，否則恐怕要喺選票上付出代價。