法國南部城市貝濟耶（Béziers）即將興建歐洲最大規模嘅中醫藥產業園區，項目獲市政府全力支持，並得到上海中醫藥大學背書。不過項目資金疑似來自中國，發起人拒絕透露金主身份，喺當地醫學界引起強烈反彈。

據報道，貝濟耶市議會喺6月5日全票通過售地方案，將一幅市政土地售予當地整骨治療師兼地產發展商6勒古里耶爾（Yves Le Gourières）主理嘅「地中海自然健康園區」公司（Campus Santé Nature Méditerranée），全場僅一名具科學背景嘅議員棄權。項目總建築面積達2.2萬平方米，設有階梯教室、宿舍同練習太極嘅空間，仲會掛上中國傳統燈籠，當中包括一所高等院校、一間健康中心、一間自閉症譜系障礙接待中心，同埋一間長者暫託中心，最快2027年秋季啟用。主辦方預計首年招收超過500名學生，完成中學課程即可入讀，課程由3年至長達11年不等，內容圍繞經絡、陰陽五行、望聞問切等傳統中醫理論。

呢間學校實際上被定位為上海中醫藥大學嘅「地方分校」，幾乎完全複製中國中醫教學體制，部分課程更要遠赴上海完成。上海中醫藥大學係中國推廣中醫嘅重要機構，據報喺捷克同摩洛哥亦有類似項目；該校代表團2024年10月曾到訪貝濟耶考察，最終促成市政府拍板。自稱二十年前遊歷中國後愛上中醫嘅勒古里耶爾，剛結束新一輪訪華行程，會見咗中醫界同中國政府代表。佢聲稱課程已獲上海中醫藥大學「認可」，但堅稱購地所需嘅63萬歐元（約573萬港元）同後續建設資金並非由中方協助籌集，惟拒絕透露真正投資者身份；無論如何，項目管理委員會已有多名中國代表參與。

法國醫學界反應激烈。接受訪問嘅醫生公會（Ordre des médecins）負責人直言，對市政府力撐項目感到非常意外，強調中醫既唔獲循證醫學認可，亦唔獲公會承認，甚至唔被中國科學醫學體系接納；公會唔會批准醫生喺呢個框架下執業，並會譴責任何聲稱具療效嘅治療師，憂慮貝濟耶淪為「另類醫學製造工廠」。其實公會全國理事會早喺2025年2月已去信高等教育部示警，惟石沉大海，當地醫生亦曾向大區衛生局反映關注。至於曾獲極右翼支持、今年3月以65.6%得票率首輪連任第三個任期嘅市長羅貝爾·梅納爾（Robert Ménard），佢領導嘅市政府就對項目表明全力支持。

事實上，另類療法近年喺法國大行其道，至少一半法國人使用過替代或輔助療法，背後反映嘅係醫療資源短缺同民眾健康訴求未獲滿足；世衛組織統計呢類療法超過400種，部分更同邪教活動有關。而最新調查亦發現，全法75間大學合共開設逾120個涉及中醫、芳香療法等缺乏科學根據嘅文憑課程，每年為院校帶來超過200萬歐元（約1,820萬港元）收入，高等教育部長巴普蒂斯特（Philippe Baptiste）已下令評估機構全面審查呢類課程。

中國方面一直將中醫藥視為國家戰略，2019年成功推動世衛組織將中醫納入《國際疾病分類》，喺非洲等地嘅中醫診所同中藥出口近年大幅增長。根據中國國家衛健委最新統計公報，截至2024年全國有6,397間中醫類醫院、97.1萬名中醫類別執業醫師；早喺2015年，中藥相關製藥產業收入已超過7,860億元人民幣，佔全國製藥業總收入28.5%。有分析認為，貝濟耶項目或者只係中國向海外輸出中醫體系嘅又一例證，項目對法國公共衛生嘅影響，勢必繼續引起爭議。