中國正喺全球範圍發起大規模追稅行動，目標係富豪階層積欠數十年、據報涉及數千億美元嘅稅款，以填補日益擴大嘅財政缺口。多名外國官員、中國銀行界人士同家族辦公室經理透露，內地銀行同金融機構已接獲指示，審查富裕客戶嘅海外投資，核實相關收益有冇向稅務當局申報；審查範圍涵蓋房地產、股票、貴金屬同加密貨幣等資產，部分個案追溯期更超過25年，最遠據報可回溯至2000年。華南一名銀行界人士指，近月銀行日益頻繁配合稅務部門，凍結富裕儲戶戶口，直至當局確認海外資產、戶口同信託嘅稅款已繳清為止，通常做法係戶主即時以現金補稅連罰款「贖番」個戶口。深圳一名家族辦公室負責人就話，有客戶被要求就2017至2022年間嘅離岸收益補稅，當局並無解釋點解針對呢段時期。加州大學聖地牙哥分校教授史宗瀚 (Victor Shih) 分析，今次行動「顯然係出於財政考量」。

翻查官方數據，2025年全國一般公共預算收入按年跌1.7%至21.6萬億元人民幣，稅收收入僅微升0.8%，曾經係地方財政命脈嘅賣地收入，更由2021年8.71萬億元嘅高峰腰斬至去年4.15萬億元。相比之下，個人所得稅去年勁升11.5%，今年上半年再增13.1%，反映向富豪開刀已經見效。

堵漏行動亦延伸至離岸信託。財政部同國家稅務總局上月底發布新規，明確離岸信託喺設立、存續同終止清算各環節均須繳納20%個人所得稅，欠稅須喺90日內清繳；上海、深圳同江蘇嘅稅局其實喺國家規則出台前，已經對個別離岸信託開徵兩成稅款。有常駐新加坡、專為中國富豪管理離岸資產嘅銀行家形容客戶「震驚」，話以往IPO盛行時期，恰當嘅信託架構可以慳返唔少所得稅，「新規終結咗呢個優勢」，預計部分人要賣資產交稅。

「財新網」週三報道，內地稅務部門已開始對香港保單收益徵收20%個人所得稅，北京同杭州已有執行個案，涵蓋保單分紅同預繳保費所賺利息。消息一出，主攻亞洲市場嘅保誠 (Prudential) 喺倫敦股價一度瀉13%，收市仍插11.6%；滙豐收市跌6.1%、渣打跌4.8%，惟滙豐同日亦受券商降級拖累。連同當局今年較早時向富途、老虎證券同長橋三間跨境券商合共重罰3.3億美元（約25.7億港元），收緊資本外流嘅意圖非常明顯。報道又指，北京對「稅務居民」嘅定義模糊，即使入籍外國或者攞咗海外永居，只要主要經濟利益仍然留喺中國、未正式放棄中國國籍，每年在華居留不足183日嘅人士照樣可能被當成中國稅務居民。常駐亞洲嘅律師萊斯佩蘭斯(David Lesperance) 透露，人工智能令官員可以用前所未有嘅速度、更低嘅成本對投資紀錄做取證分析；隨住壓力加劇，佢至少六名中國超高淨值客戶已經「扣動扳機」，落實離開呢個世界第二大經濟體嘅計劃。國家稅務總局未有回應置評請求。