醞釀多年嘅加拿大首個外國影響力透明度登記制度，8月4日（周二）正式生效，首任專員博格曼（Anton Boegman）同日履新。今後凡係同外國委託方有安排、企圖影響加拿大政治或政府程序嘅個人同機構，都要公開登記，違規者最高可被罰款100萬加元，甚至面臨刑事檢控。

制度源於加拿大連年嘅外國干預風波。加拿大安全情報局（CSIS）點名中國同印度喺當地積極從事干預同間諜活動；由法官霍格（Marie-Josée Hogue）主持嘅公開調查，2025年1月發表最終報告，直指中國係針對加國民主制度最活躍嘅干預者，印度居次。杜魯多政府2023年展開公眾諮詢，2024年5月向國會提交C-70法案，同年6月獲御准，但登記制度拖足兩年幾先至落實；卡尼政府因進度緩慢、又被指急於同中印修好，一直受反對黨同僑民團體炮轟。

按新例，觸發登記須同時符合三項標準：同外國委託方存在安排；安排旨在影響加拿大政治或政府程序；以及涉及特定施加影響力嘅活動。外國委託方定義相當闊，除咗外國政府，仲包括國家擁有或控制嘅經濟實體，即係主權財富基金都計埋，連北約、聯合國等多邊組織亦囊括在內。影響力活動涵蓋同公職人員或公眾溝通，官方網站列明已刊登或播出嘅媒體訪問都可能計入，換言之刊登外國官員專訪嘅記者都可能要登記，法律界同公民權利組織質疑範圍過闊，促請專員辦公室盡快釐清界線。

現有相關安排嘅人士須喺60日內完成登記，新安排則須喺14日內申報，內容包括出生日期、商業編號、委託方資料同報酬詳情；罰款由250加元至100萬加元不等。政府年初刊憲嘅監管分析參考澳洲經驗，估計約872名個人同1550間企業需要登記。

博格曼強調制度刻意涵蓋廣泛，為咗減低走漏洞嘅風險，形容「呢個係透明度要求，並非限制合法參與公民討論」。獲認證外交官同依職權行事嘅本國官員可獲豁免，涉及原住民社區嘅條款就暫未納入。佢同時坦言辦公室解決唔到外國干預問題，應對干預始終係皇家騎警同國安機構職責。佢又明言涉及台灣政府嘅影響力活動同樣受規管——多年嚟，台北駐加經濟文化代表處正係資助加國議員訪台最頻繁嘅機構之一。

關注在加港人處境嘅香港監察（Hong Kong Watch）歡迎制度生效，指2024年曾喺國會兩院作證支持C-70法案，認為登記制度有助打擊針對港人等離散社群嘅跨國鎮壓。博格曼曾任卑詩省首席選舉官，專員任期最長七年；佢透露履新前仲未收到任何安全機構簡報，預計未來一週先至開會。