美國總統特朗普周一再向石油業開火，點名批評雪佛龍行政總裁沃思 (Mike Wirth)，不滿對方接受電視訪問時冇將政府扶助石油業嘅功勞歸於特朗普政府。今次爭端源於沃思早前上霍士新聞節目、接受主持人巴蒂羅莫 (Maria Bartiromo) 訪問，特朗普喺社交平台Truth Social發文話，沃思「唯一刻意唔提嘅係，如果冇特朗普政府嘅天才、遠見、實力同穩定，石油業以至我哋國家本身早已完蛋」，又提到「佢哋曾經將沃思同雪佛龍趕出委內瑞拉，但依家佢哋返晒嚟，仲要比以前更大更強，指望大賺一筆」，並警告其他石油公司一樣，「即刻將消費者零售油價降落嚟，而家就做！」

同日稍後，特朗普喺白宮向記者加碼開火，直指埃克森美孚 (ExxonMobil) 同雪佛龍賺取暴利：「雪佛龍，太多錢；埃克森美孚，太多，太多錢喇」，仲話「我唔鍾意」，油企應該「回饋部分俾公眾」。佢強調自己係最擁護自由市場嘅人，但油企依家嘅厚利建基於供應短缺，又警告油商「最好調低零售價、消費者價格」。路透社形容，呢番言論同特朗普一貫同石油業結盟嘅立場明顯有別。

美國同以色列2月28日聯手空襲伊朗，德黑蘭一度反制、扼殺荷姆茲海峽石油出口，觸發歷來最大規模嘅供應中斷；美國汽車協會 (AAA) 數據顯示，全國汽油均價由開戰前夕每加侖2.98美元升至周一約4.1美元，貴咗近四成。生活成本壓力令共和黨喺11月中期選舉前面對政治風險，隨時失守眾議院多數，連參議院控制權都告急。

油企就賺到盤滿缽滿。雪佛龍同埃克森美孚上周五公布第二季業績，前者純利按年急升近四倍至120億美元，後者升逾一倍至145億美元，兩間公司合共勁賺265億美元（約2,067億港元）；煉油商瓦萊羅能源 (Valero Energy) 純利37億美元，創2022年俄烏戰爭引發能源危機以嚟新高，馬拉松石油 (Marathon Petroleum) 就預定周二先放榜。據內部電郵，雪佛龍仲向大部分員工派發相當於半個月底薪嘅花紅。業界組織美國石油學會就反駁，話油價高企源於全球供求同荷姆茲海峽等航道局勢不明朗，唔係任何一間公司造成。

油價方面，特朗普上周末煞停佢形容為「二戰以嚟最大規模」嘅對伊朗空襲，聲稱協議「迫在眉睫」、談判周一展開，布蘭特期油周一應聲插水5%，報每桶82.91美元，較上月101美元高位回落近兩成，雪佛龍股價周一亦跌近2%。不過伊朗外交部即刻潑冷水，發言人巴加伊 (Esmaeil Baghaei) 話「目前同美國冇任何談判」，只係同阿曼商討海峽臨時安全航道，特朗普隨即反轟伊朗領導層「口是心非到難以置信」，油價回落能否持續成疑；有分析亦提醒，就算原油持續回落，都要一段時間先會反映喺油站零售價。至於特朗普口中嘅委內瑞拉往績，雪佛龍喺當地經營超過一個世紀，2007年時任總統查韋斯 (Hugo Chávez) 將石油項目國有化時都冇撤走，反而埃克森美孚同康菲石油 (ConocoPhillips) 當年選擇離場。