美國同伊朗之間持續五個月嘅戰爭再度升級，戰火進一步蔓延至海灣多國。科威特國防部周四（30日）宣布，伊朗一次襲擊擊中科威特北部一棟屬於中國公司嘅建築物，造成一名工人死亡。國防部聲明直斥：「伊朗令人髮指嘅侵略，襲擊咗我國北部一棟屬於中國公司嘅建築，導致一名工作人員死亡，並對建築造成嚴重財產損失。」聲明無交代死者國籍，僅表示有關部門事發後即時應變，武裝部隊會採取一切必要措施，捍衛國家主權、安全同穩定。

中國駐科威特大使館其後澄清，死者係一名受僱於分包商嘅尼泊爾籍司機，並非中國公民，事件中無中國公民傷亡，但公司財產損失嚴重。另據當地英文媒體《科威特時報》報道，中國大使館強烈譴責今次襲擊，強調應透過外交接觸緩和局勢，並警告各方切勿採取進一步破壞地區穩定嘅行動。事實上科威特近幾個星期已多次成為目標，境內美軍使用嘅阿里薩利姆（Ali Al-Salem）空軍基地、邊境口岸以至海上石油平台早前先後中招。

同日戰況喺多條戰線同步升溫。約旦連續第二日攔截伊朗導彈，擊落五枚來襲導彈，無人傷亡。美軍中央司令部就表示，已完成對伊朗「一輪猛烈打擊」，摧毀數十個革命衛隊目標，包括軍事指揮中心、導彈同無人機設施，以報復伊朗早前以導彈襲擊美軍駐約旦基地；總統特朗普事前揚言要「非常狠」咁打擊伊朗。伊朗官方通訊社IRNA就報道，霍爾木茲海峽附近嘅格什姆島（Qeshm）遇襲，造成三死兩傷。

戰事亦首度波及埃及。英國海事保安公司安布里（Ambrey）表示，埃及北部達米埃塔（Damietta）港兩艘天然氣船周三遭襲起火，分別係一艘美資浮式儲存再氣化船同一艘希臘油輪，幸無人受傷。埃及總理府初步調查證實火警由無人機引致，但未確認襲擊方身份；特朗普被問到係咪伊朗所為，僅回應「都係差唔多嘅事」。港口周四已恢復全面運作。

另一邊廂，美國聯同沙特周三空襲伊拉克境內親伊朗民兵，至少20名武裝分子同六名伊朗軍事顧問喪生。沙特指控有關組織連日以無人機襲擊其石油設施，組織否認；另一親伊朗武裝、也門胡塞組織就承認襲擊沙特能源設施，衛星圖像亦顯示沙特阿美旗下阿布蓋格（Abqaiq）煉油設施受損。沙特國防大臣哈立德（Khalid bin Salman）周三分別會晤特朗普同副總統萬斯，表明唔會容忍石油命脈受威脅，但同時希望華府同德黑蘭重返談判桌。

呢場今年二月爆發嘅戰爭，已令和平時期承載全球兩成石油天然氣運輸嘅霍爾木茲海峽再度實際封閉，燃料同基本物價應聲急升。曾斡旋臨時協議嘅巴基斯坦表示，各方談判持續，重點係令海峽局勢正常化。特朗普堅稱同德黑蘭談判「進展良好」，但警告若最終無協議，美方隨時打擊伊朗嘅地下設施、橋樑同電力基建。