環保組織「全球生態足跡網絡」（Global Footprint Network）公布，2026年嘅「地球超載日」（Earth Overshoot Day）落喺7月30日，即係噚日。換言之，人類唔使七個月，就已經用晒地球成年先至再生到嘅生態資源，由噚日起直到年底嘅五個月，全人類都係喺度「透支」緊個地球。

所謂超載，係指人類消耗木材、魚類、耕地等資源，加上排放溫室氣體嘅速度，超出咗地球生態系統再生同自我修復嘅能力。組織於6月5日世界環境日喺瑞士日內瓦公布計算結果，指人類目前消耗自然資源嘅速度，比地球再生能力快73%，相當於需要1.73個地球先至夠用，係人類歷史上最高嘅透支水平。自1970年代初全球開始透支以嚟，累積嘅「生態欠債」已相當於地球20.6年嘅完整生物生產力；大氣溫室氣體濃度亦由1972年嘅367ppm二氧化碳當量，升至今年嘅547ppm。

表面睇，今年超載日比2025年嘅7月24日遲咗六日，2024年更加係8月1日，過去十年日子大致徘徊喺7月底8月初，有分析認為同民眾環保意識提升、全球經濟增長放緩有關。不過組織強調唔好高興得太早：今年日子推遲，主因係修訂咗海洋吸碳能力嘅數據，令日子推遲八日；實際上人類生態足跡過去一年繼續擴大，令日子提前兩日，兩者相抵先至出現遲六日嘅結果，反映嘅係數據更新，並唔係透支真係有減少。

透支嘅代價已經有跡可尋。2023年刊於《科學》期刊嘅研究發現，受氣候暖化、人類用水同泥沙淤積影響，1992至2020年間全球逾半大型湖泊蓄水量顯著下跌，全球約四分一人口正正住喺湖泊萎縮嘅流域；另一項刊於《自然》期刊嘅研究亦指，本世紀全球地下水位急跌情況普遍，據報約七成地下水層錄得下降。魚類同森林資源同樣因過度開發持續減少。

各國「碌卡」程度差天共地。人均消耗最勁嘅卡塔爾，超載日早喺2月4日已經殺到——假如全人類都好似卡塔爾人咁生活，需要10個地球先夠。美國嘅超載日係3月14日，相當於5.1個地球；南韓係4月9日，歐盟整體係5月3日，德國5月10日，日本5月14日，中國就係5月27日，相當於2.5個地球。相反，如果全人類都好似孟加拉人咁生活，只需0.46個地球嘅再生能力已經足夠，印度係0.75個，菲律賓0.94個，塞內加爾0.99個，呢啲國家根本唔會出現超載。

組織董事、「生態足跡」概念創始人之一韋克納格（Mathis Wackernagel）警告，基於物理定律，透支唔可能無限期持續落去，終結只有兩種方式：一係人類主動設計改變，一係等災難埋單。組織指出，扭轉局面嘅方法其實一直存在，單係將化石燃料嘅二氧化碳排放減半，已經可以將超載日推遲成三個月。由噚日起計，今年仲有超過五個月，地球呢張「信用卡」，人類注定要繼續碌落去。