中國商務部7月28日發表題為《關於所謂「產能過剩」問題的中方立場》嘅萬字文件，並喺國務院新聞辦公室記者會上由副部長鄢東親自解畫，全面反駁歐美近年炒作嘅「中國產能過剩」同「中國衝擊2.0」論調。文件出台背景，係中國去年貨物貿易順差高達1.19萬億美元（約9.3萬億港元），按年急升近兩成，創歷史新高，亦係全球唯一突破萬億美元順差嘅國家，令歐美以至新興市場都憂慮本土工業根基受衝擊。

文件強調中國從不刻意追求貿易順差，「出口多、順差大不等於產能過剩」，中國經常帳順差佔GDP約3.7%，仍處於國際公認合理區間；文件又提出「順差在中國，利益在各方」，去年外資企業佔中國出口27%、順差16%。至於最具爭議嘅補貼問題，北京反指產業補貼同產能過剩唔存在必然聯繫，更點名美國7,500億美元嘅《通脹削減法案》，以及歐盟委員會2021至2030年間估計達1.44萬億歐元嘅補貼計劃，強調大國應該喺補貼合規上作出表率。

商務部政策研究室主任林衛龍就針對美國早前就產能問題發起嘅301調查開火，批評係典型嘅單邊主義行徑，指美方唔可以狹隘噉將超過國內需求嘅生產能力定義為「產能過剩」，更無權單方面認定並採取限制措施。佢又反駁「內需不足導致產能過剩」嘅講法，指2013至2024年內需對中國經濟增長平均貢獻率達93%。文件將中國產業發展定性為「中國機遇2.0」，呼應總理李強6月24日喺大連夏季達沃斯論壇嘅發言，李強當時仲話中國產品競爭力唔係靠補貼：「中國政府還沒有這麼富有，我們也補不起。」

不過西方嘅分析同北京講法南轅北轍。經濟合作與發展組織（OECD）6月初發表報告，保守估算中資企業喺2005至2024年間獲得嘅政府支持，係OECD成員國企業嘅3至8倍；單計2024年，15個關鍵行業嘅中企已獲1,080億美元（約8,400億港元）補貼。報告又指，過去20年全球企業市佔增長平均只有22%可歸因於補貼，中資企業比例卻接近60%。秘書長柯爾曼（Mathias Cormann）更將呢種做法比喻為運動員服食「興奮劑」，令效率較低嘅參與者以不公平方式勝出。

學界睇法都幾分歧。榮鼎集團（Rhodium Group）專家班開玫（Camille Boullenois）表示，補貼造成資源錯配，中國消費者冇錢消費、歐洲企業又受重創，係雙輸局面；耶魯大學經濟學家齊利博蒂（Fabrizio Zilibotti）就話，西方消費者同中國產業工人其實受惠不少；科隆德國經濟研究所嘅馬特斯（Jürgen Matthes）則堅持人民幣匯率被人為低估，主張歐盟開徵反補貼關稅屬「再平衡」而非保護主義。對此商務部已預先落閘，強調中國製造具國際競爭力，冇必要通過匯率低估促進出口。

值得留意嘅係，文件發表之際，中國第二季GDP按年僅增長4.3%，低過全年4.5%至5%嘅目標區間，中共政治局本週開會部署下半年經濟工作；而法國總統馬克龍早喺去年12月已警告，若北京唔正視貿易失衡，歐洲最終或被迫喺戰略領域同中國「脫鈎」。