美伊戰事持續升級，美國總統特朗普周三喺社交平台Truth Social發出最新警告，聲言由此刻起，只要伊朗以導彈、火箭、無人機或任何武器襲擊霍爾木茲海峽嘅船隻，美方就會「轟炸並摧毀一座橋樑或發電廠」，目標包括位於首都德黑蘭市內或周邊嘅設施。伊朗革命衛隊旗下塔斯尼姆通訊社隨即引述軍方消息人士還擊，警告美方一旦落手，伊朗將打擊區內基建，包括美國有利益嘅能源設施。曾主導對美談判嘅伊朗議會議長卡利巴夫（Mohammad Bagher Ghalibaf）亦強調，若伊朗安全得唔到保障，任何基建都唔會安全，海峽安全「取決於美軍不再干預」。

戰火同日未有停歇。美軍連續第11晚空襲伊朗，目標包括軍事指揮中心、飛機庫同無人機儲存設施，德黑蘭上空一度響起防空炮火；伊朗就向同以色列城市埃拉特（Eilat）一水之隔嘅約旦亞喀巴發射導彈同無人機，約旦軍方稱攔截四枚導彈四架無人機，巴林同沙特阿拉伯達曼亦一度響起警報。伊朗衛生部指，過去11日美軍空襲造成最少53名伊朗人死亡，包括6名婦女3名兒童，近600人受傷；美軍陣亡人數就增至18人，特朗普周三親赴多佛空軍基地，迎接4名喺約旦同伊拉克遇襲身亡士兵嘅靈柩，係開戰以嚟第三次。

國防部長赫格塞思早一日喺參議院聽證會透露，呢場2月底爆發嘅戰爭至今已耗資375億美元（約2,925億港元），並要求國會追加撥款，民主黨參議員警告美國恐再陷「無休止嘅戰爭」。經濟代價同樣沉重：和平時期承載全球五分一石油天然氣貿易嘅霍爾木茲海峽，美聯社形容目前大致封閉，美軍雖聲稱海峽仍然開放、自5月起已護航約900艘商船，但伊朗過去三個月已襲擊超過30艘商船。布倫特期油周三急升約4%，突破每桶94美元，係6月初以嚟高位，較月初不足72美元大幅反彈；胡塞武裝更揚言襲擊紅海嘅沙特船隻，令另一咽喉要道拉起警報，戰事亦喺秋季美國中期選舉前持續推高燃油價格。

外交層面暫無突破。國務卿魯比奧喺馬尼拉警告，絕不能容許伊朗控制國際水道、向商船收「過路費」，否則等同開創危險先例；特朗普就直言美方「無興趣會面」，並暗示或打擊納坦茲附近、建於山體深處嘅「鎬山」地下核設施。聯合國秘書長古特雷斯譴責雙方攻擊民用基建「不可接受」，伊朗近期亦有還擊海灣國家嘅能源設施同海水化淡廠。與此同時，特朗普已批准同沙特簽訂為期30年民用核協議，或容許沙特濃縮鈾，最快周三公布。