美國國會兩黨參議員提出《制止跨境鎮壓法案》，擬對喺美國境內騷擾、脅迫或威脅他人嘅「外國政府代理人」加重刑罰，應對中國同伊朗日益猖獗嘅跨國鎮壓行動。路透社引述參議院幕僚透露，中國《民族團結進步促進法》7月1日生效，正係今次立法嘅直接導火線。

法案由民主黨加州參議員謝安達（Adam Schiff）同共和黨猶他州參議員柯蒂斯（John Curtis）共同提出，將「跨境鎮壓」定義為外國政府代理人或代表「騷擾、脅迫或威脅他人，包括使用武力或令人合理恐懼死亡」嘅行為。法案一旦通過，將首度喺美國聯邦法律明確定義呢類罪行，違者最高可加監10年，另加罰款最多10萬美元（約78萬港元）。謝安達指，報告顯示呢類國安威脅不斷擴大，中國等國家恐嚇異見者嘅手法愈嚟愈明目張膽；柯蒂斯就強調，無論係中共、伊朗定其他威權政權，跨境鎮壓都係對美國主權同自由嘅攻擊。

觸發立法嘅《民族團結進步促進法》今年3月經中國全國人大通過，全法7章65條，涵蓋教育、出版、網絡、企業以至宗教，並涉及香港、澳門、台灣同海外華僑。最具爭議嘅第63條列明，境外組織同個人若被認定「破壞民族團結進步、製造民族分裂」，可依法追責，外界質疑形同「長臂管轄」。中國駐美大使館發言人劉暢反駁，指跨境鎮壓概念「完全係捏造出嚟」，強調中國政府嚴格遵守國際法，充分尊重他國執法主權。

不過據人權組織「自由之家」統計，2014年以嚟全球有紀錄嘅跨境鎮壓個案之中，中國涉及319宗，居各國之首。今年5月，紐約長樂公會前主席盧建旺（Harry Lu）被裁定非法擔任外國政府代理人罪成，因佢受北京指使喺曼哈頓設立「秘密警察站」，監控在美異見人士；另有兩名男子因參與伊朗政府指使、圖謀跟蹤殺害一名伊朗裔美籍人權活動人士，今年分別被判囚10年同15年。

台灣方面，行政院已成立跨部會平台研議應對新法。陸委會統計，2024年至今年7月8日，台灣人赴中失聯、被留置或遭限制人身自由累計達385人，單係6月底至7月9日已新增10人失聯，當局宣布今後逢周四公布最新數據。國台辦發言人朱鳳蓮周三反斥陸委會「編造假訊息」、「其行可惡，其心可誅」，並稱2024年以嚟逾5,170萬人次台灣人往返大陸，「只要不從事違法犯罪的活動」，完全可以「高高興興的來，平平安安的回」。