美伊喺霍爾木茲海峽嘅對抗全面升級。美軍昨日恢復對伊朗港口嘅海上封鎖，並連續第五日空襲伊朗本土，報復德黑蘭連日襲擊行經海峽嘅商船，週二仲有兩艘油輪中彈。美國同以色列2月28日對伊朗開戰後，德黑蘭一度封鎖呢條平時承載全球約兩成石油同天然氣貿易嘅水道，油價曾飆至近每桶120美元（約936港元）；美方4月首度封鎖伊朗港口，直至6月雙方簽署備忘錄、開展60日談判先至解除。惟核談判膠着，連日互轟已令臨時協議名存實亡，中東隨時重陷全面戰爭。

美國中央司令部表示，美軍一夜之間打擊數十個目標，其後罕有地喺日間繼續空襲，深夜再展開新一輪攻勢，目標包括被視為海峽戰略要塞嘅大通布島（Greater Tunb）導彈同防禦設施，以及阿巴斯港、布什爾等南部沿岸城鎮。伊朗官方電視台報道，美軍向錫斯坦-俾路支斯坦省一個步兵旅軍營發射至少13枚導彈，最少7名官兵喪生。伊朗衛生部發言人克爾曼普爾（Hossein Kermanpour）公布，近日空襲累計造成超過35人死亡、逾300人受傷，72人留醫，但當局並無區分死傷者係軍人定平民。

伊朗就向巴林、科威特、約旦等駐有美軍嘅國家發射數十枚導彈同無人機還擊，約旦擊落3枚來襲導彈，巴林一度呼籲民眾即刻走避。革命衛隊更威脅切斷成個中東嘅能源出口，聲言「地區嘅石油天然氣出口，一係屬於所有人，一係無人有份」。國會議長兼首席談判代表卡利巴夫（Mohammad Bagher Qalibaf）指控華府以武力推翻臨時協議下嘅「伊朗安排」，強調伊朗已準備好更全面嘅軍事對抗。

特朗普就聲稱伊朗「想和解」，揚言「究竟同佢哋傾掂，定係索性了斷，好快有答案」，並警告若談判唔恢復，下週或轟炸伊朗橋樑同發電廠。佢同時放棄向過峽商船徵收貨值兩成「保護費」嘅計劃，改為接受海灣國家對美投資。中央司令部指，封鎖重啟17小時內已「改航」兩艘試圖闖關嘅商船。市場方面，布蘭特期油星期三升穿每桶85美元（約663港元），較開戰前高逾15%；國際貨幣基金組織警告，全球石油庫存嘅緩衝「已經所剩無幾」。11月美國國會中期選舉在即，高油價正正係特朗普同共和黨嘅計時炸彈。